అంతర్జాతీయం: 2024: ప్రకృతి ప్రకోపాలు, మానవ ప్రేరేపిత విషాదాల ఏడాది
మరికొన్ని గంటల్లో కొత్త సంవత్సరంలోకి అడుగుపెట్టబోతున్న తరుణంలో 2024లో జరిగిన ప్రధాన ప్రకృతి వైపరీత్యాలు, మానవ ప్రేరేపిత విషాదాలను ఒకసారి తిరిగి చూస్తూ ఈ ఏడాది ఎన్నో విషాదాలను మిగిల్చిందని స్పష్టమవుతుంది. ప్రకృతి శక్తుల పట్ల మానవులు తగిన శ్రద్ధ చూపకపోవడం, కొన్ని సందర్భాల్లో వారి చర్యలే ఆపదలకు కారణమయ్యాయి.
ప్రకృతి వైపరీత్యాలు
జపాన్‌లో జనవరి భూకంపం
2024 మొదటి రోజే జపాన్‌ గడగడలాడిపోయింది. ‘నోటో’ ద్వీపంలో జనవరి 1న సంభవించిన భారీ భూకంపం పలు కట్టడాలను నేలమట్టం చేసింది. 280 మంది ప్రాణాలు కోల్పోయారని అధికార గణాంకాలు వెల్లడించాయి. ఈ ఘటన భూకంపాలకు ముందు జాగ్రత్త చర్యల అవసరాన్ని గుర్తు చేస్తుంది.
ఇథియోపియాలో కొండచరియలు విరిగిపడి 250 మంది మరణం
జులై 21, 22 తేదీల్లో ఇథియోపియాలోని గోఫా ప్రాంతంలో కొండచరియలు విరిగిపడి 250 మంది ప్రాణాలు కోల్పోయారు. పర్యావరణ సమతుల్యత లోపించకుండా జాగ్రత్తలు తీసుకోకపోతే జరుగుతున్న విపత్తులకు ఇది ఉదాహరణగా నిలుస్తోంది.
వయనాడ్‌లో కురిసిన విలయం
కేరళలోని వయనాడ్‌ జిల్లాలో జులై 30న సంభవించిన భారీ వర్షాలు, కొండచరియల విరిగిపడటంతో 254 మంది మరణించారు. వందలాది మంది నిరాశ్రయులయ్యారు. ప్రకృతి సంరక్షణకు చర్యలు తీసుకోకపోతే ఇలాంటి ఘటనలు మరింత తీవ్రమవుతాయని ఇది స్పష్టమవుతోంది.
అమెరికాలో హెలెన్‌ తుపాను విధ్వంసం
అగ్రరాజ్యం అమెరికా సెప్టెంబరులో హెలెన్‌ తుపానుతో తడిసి ముద్దయింది. దక్షిణ ప్రాంతాలను ధ్వంసం చేసిన ఈ తుపాను 235 మంది ప్రాణాలను బలి తీసుకుంది. గతంలో కత్రినా తుపాను తర్వాత ఇది అత్యంత విధ్వంసకరమైనదిగా ప్రభుత్వం పేర్కొంది.
మొజాంబిక్‌ చిడో తుపాను బాధితులు
ఆఫ్రికాలోని మొజాంబిక్‌ దేశంలో చిడో తుపాను కారణంగా 94 మంది ప్రాణాలు కోల్పోగా, 6.22 లక్షల మంది నిరాశ్రయులయ్యారు. ఆహారం, ఆవాసం లేకుండా ప్రజలు పడిన కష్టాలు మరువలేనివి.
తూర్పు ఆసియాలో యాగీ టైఫూన్‌ ప్రభావం
తూర్పు ఆసియాలో సెప్టెంబరులో సంభవించిన యాగీ టైఫూన్‌ 844 మంది ప్రాణాలు బలి తీసుకుంది. వియత్నాం, మయన్మార్‌, లావోస్‌ వంటి దేశాల్లో ఈ జల విలయం మౌలిక సదుపాయాలను పూర్తిగా దెబ్బతీసింది.
మానవ ప్రేరేపిత విషాదాలు
మాస్కో సంగీత కచేరీలో కాల్పుల కలకలం
మార్చి 22న మాస్కోలో నిర్వహించిన సంగీత కచేరీలో కొందరు ఉగ్రవాదులు విచక్షణారహితంగా కాల్పులు జరిపారు. 154 మంది మరణించగా, 500 మందికిపైగా గాయపడ్డారు. ఈ దుర్ఘటన ప్రపంచాన్ని షాక్‌కు గురిచేసింది.
బంగ్లాదేశ్‌ అల్లర్ల కారణంగా 650 మంది మృతి
బంగ్లాదేశ్‌లో రిజర్వేషన్ల రద్దు కోరుతూ చేపట్టిన నిరసనలు తీవ్ర హింసకు దారితీశాయి. ఈ అల్లర్లలో 650 మందికి పైగా ప్రాణాలు కోల్పోగా, దేశ ప్రధాని షేక్‌ హసీనా దేశం విడిచి వెళ్లిపోవాల్సి వచ్చింది.
రష్యా-ఉక్రెయిన్‌ యుద్ధం
2022లో ప్రారంభమైన రష్యా-ఉక్రెయిన్‌ యుద్ధం ఇప్పటికీ కొనసాగుతూనే ఉంది. ఈ యుద్ధం 2024లో 12,340 మంది ప్రాణాలు తీసినట్లు గణాంకాలు చెబుతున్నాయి.
ఇజ్రాయెల్‌పై హమాస్‌ దాడులు
2023లో ప్రారంభమైన ఈ యుద్ధం ఇప్పటికీ కొనసాగుతూనే ఉంది. గాజా, లెబనాన్‌, ఇరాన్‌ ప్రాంతాల్లో ఇప్పటికీ శాంతి కురువకుండా ప్రజలు భయంతో బతుకుతున్నారు.