హైదరాబాద్‌: తెలంగాణ రాష్ట్రంలో నిరుద్యోగులు ఎన్నాళ్ళగానో ఎదురు చూస్తున్న ఉపాధ్యాయ అర్హత పరీక్ష (టెట్)కు సంబంధించిన నోటిఫికేషన్ ను ఇవాళ ప్రభుత్వం విడుదల చేసింది.
ఈ మధ్యనే తెలంగాణ ముఖ్యమంత్రి కేసీఆర్ అసెంబ్లీ సాక్షిగా ఉద్యోగ నియామకాలపై స్పష్టమైన ప్రకటన చేసారు. ఈ నేపథ్యంలోనే తాజాగా ఈ నోటిఫికేషన్ విడుదల జరిగింది. మార్చి నెల 26వ తేదీ నుండి ఏప్రిల్ 12వ తేదీ వరకు టెట్ దరఖాస్తులు స్వీకరిస్తారు. జూన్ 12వ తేదీన రాష్ట్రవ్యాప్తంగా టెట్ పరీక్ష నిర్వహించబోతున్నారు.
కాగా తెలంగాణ రాష్ట్రంలో ఖాలీగా ఉన్న ఉపాధ్యాయ పోస్టుల్లో 13,086 ఉపాధ్యాయ పోస్టులను భర్తీ చేస్తామని సీఎం కేసీఆర్ ప్రకటించారు. ఈ క్రమంలోనే టెట్ నిర్వహణకు విద్యాశాఖకు ప్రభుత్వం నుంచి అనుమతులు మంజూరైనట్టు తెలుస్తోంది. కాగా, టెట్ పూర్తయితే టీచర్ నియామకాల ప్రకటన వచ్చే అవకాశాలున్నాయి.