ఢిల్లీ: మద్యం కుంభకోణం కేసులో ఢిల్లీ ముఖ్యమంత్రి అరవింద్ కేజ్రీవాల్, మాజీ ఉప ముఖ్యమంత్రి మనీష్ సిసోడియా, బీఆర్‌ఎస్ ఎమ్యెల్సీ కల్వకుంట్ల కవిత వారి జ్యుడీషియల్ కస్టడీని మరోసారి పొడిగించారు.
సీబీఐకి సంబంధించిన కేసులో వారి జ్యుడీషియల్ కస్టడీని కోర్టు ఆగస్టు 9 వరకు పొడిగించింది. వీడియో కాన్ఫరెన్స్ ద్వారా ముగ్గురు నేతలు ఇవాళ కోర్టుకు హాజరయ్యారు.
సీబీఐ కేసులో అరవింద్ కేజ్రీవాల్ జ్యుడీషియల్ కస్టడీని మాత్రమే పొడిగించారు, అయితే ఈడీ కేసులో ఆయనకు బెయిల్ మంజూరు అయ్యింది.
ఢిల్లీ మద్యం కుంభకోణానికి సంబంధించి మనీలాండరింగ్ కేసులో ఈడీ మరియు సీబీఐలు తమ దర్యాప్తును పూర్తిచేశాయి. సీబీఐ సోమవారం ఢిల్లీ రోస్ అవెన్యూ కోర్టులో అరవింద్ కేజ్రీవాల్‌పై ఛార్జిషీట్ దాఖలు చేసింది.
ఈ ఛార్జిషీట్‌లో ఆమ్ ఆద్మీ పార్టీ నేత దుర్గేష్ పాఠక్, వ్యాపారవేత్త పి శరత్ చంద్రారెడ్డి, వినోద్ చౌహాన్, ఆశిష్ మాథుర్, అమిత్ అరోరా పేర్లు కూడా ఉన్నాయి.
అదే సమయంలో, ఈ కేసులో ఇప్పటికే ఈడీ ఛార్జిషీట్ దాఖలుచేసింది. సీబీఐ చార్జిషీట్‌పై విచారణ ఆగస్టు 12న జరగనుంది.
సీఎం అరవింద్ కేజ్రీవాల్ రెగ్యులర్ బెయిల్ పిటిషన్‌పై ఢిల్లీ హైకోర్టు సోమవారం తన తీర్పును రిజర్వ్ చేసింది. విచారణ సందర్భంగా, కేజ్రీవాల్ బెయిల్ పిటిషన్‌ను సీబీఐ వ్యతిరేకించింది, ఢిల్లీ మద్యం కుంభకోణంలో కేజ్రీవాల్ సూత్రధారి అని వాదించింది.
మనీలాండరింగ్ కేసులో సుప్రీంకోర్టు ఇటీవల మధ్యంతర బెయిల్ మంజూరు చేసింది. అంతకుముందు, జూన్ 20న ట్రయల్ కోర్టు కేజ్రీవాల్‌కు బెయిల్ మంజూరు చేసింది, అయితే మరుసటి రోజే ఈడీ ఢిల్లీ హైకోర్టులో స్టే తీసుకుంది.