న్యూడిల్లీ: జమ్మూ కాశ్మీర్ మరియు హర్యానా రాష్ట్రాల అసెంబ్లీ ఎన్నికల షెడ్యూల్‌ను ఈసీ అధికారికంగా ప్రకటించింది. ప్రధాన ఎన్నికల కమిషనర్ రాజీవ్ కుమార్ ఈ షెడ్యూల్‌ను విలేకరుల సమావేశంలో వివరించారు. జమ్మూ కాశ్మీర్‌లో ఎన్నికలు మూడు దశల్లో, హర్యానాలో ఒకే దశలో నిర్వహించనున్నట్లు తెలిపారు.
ఈ ఎన్నికలు లోక్‌సభ ఎన్నికల తర్వాత జరిగే రెండో ముఖ్యమైన ఎన్నికలుగా ఉన్నాయని సీఈసీ రాజీవ్ కుమార్ వెల్లడించారు. గతంలో జరిగిన లోక్‌సభ ఎన్నికలు ప్రశాంతంగా ముగిసినట్లు, ఈ ఎన్నికలు కూడా అలాగే సజావుగా సాగాలని ఆశాభావం వ్యక్తం చేశారు. దేశవ్యాప్తంగా ఈ ఎన్నికలు పై ప్రపంచ వ్యాప్తంగా చర్చ జరుగుతుందని, లోక్‌సభ ఎన్నికల్లో ఎన్నో రికార్డులు సృష్టించామని ఆయన అన్నారు.
హర్యానా ఎన్నికలు:
హర్యానా అసెంబ్లీ ఎన్నికలకు సంబంధించిన నోటిఫికేషన్ సెప్టెంబర్ 5న విడుదల కానుంది. నామినేషన్ దాఖలుకు చివరి తేదీగా సెప్టెంబర్ 12ని నిర్ణయించారు. అక్టోబర్ 1న ఓటింగ్ జరగనుంది, అక్టోబర్ 4న ఫలితాలు వెలువడనున్నాయి.
జమ్మూ కాశ్మీర్ ఎన్నికలు:
జమ్మూ కాశ్మీర్‌లో మూడు దశల్లో ఎన్నికలు జరుగనున్నాయి.
మొదటి దశ:
- నోటిఫికేషన్ ఆగస్టు 20న విడుదల కానుంది.
- నామినేషన్‌కు చివరి తేదీ ఆగస్టు 27.
- అభ్యర్థిత్వ ఉపసంహరణకు ఆగస్టు 30 చివరి తేదీ.
- ఎన్నికలు సెప్టెంబర్ 18న నిర్వహించబడతాయి.
రెండో దశ:
- నోటిఫికేషన్ ఆగస్టు 29న విడుదల అవుతుంది.
- నామినేషన్‌కు చివరి తేదీగా సెప్టెంబర్ 5ని నిర్ణయించారు.
- అభ్యర్థిత్వ ఉపసంహరణకు చివరి తేదీ సెప్టెంబర్ 9.
- ఎన్నికలు సెప్టెంబర్ 25న నిర్వహించబడతాయి.
మూడో దశ:
- నోటిఫికేషన్ సెప్టెంబర్ 5న విడుదల కానుంది.
- నామినేషన్ దాఖలుకు చివరి తేదీ సెప్టెంబర్ 12.
- అభ్యర్థిత్వ ఉపసంహరణకు చివరి తేదీ సెప్టెంబర్ 17.
- ఈ దశకు సంబంధించిన ఎన్నికలు అక్టోబర్ 1న జరుగుతాయి.
- ఫలితాలు అక్టోబర్ 4న ప్రకటించబడతాయి.
ఈ ఎన్నికల ప్రక్రియలో పాల్గొనే ప్రతి ఒక్కరూ నిబంధనలను పాటిస్తూ, శాంతియుతంగా ఎన్నికల నిర్వహణకు సహకరించాలని ఎన్నికల సంఘం కోరింది.