తెలంగాణ: ప్రముఖ ఐఫోన్ తయారీదారు ఫాక్స్‌కాన్ చైర్మన్ యాంగ్ లియు త్వరలో హైదరాబాద్ నగరాన్ని సందర్శించనున్నట్లు ప్రకటించారు.
ఆగస్టు 16, శుక్రవారం, తెలంగాణ ముఖ్యమంత్రి రేవంత్ రెడ్డితో న్యూఢిల్లీలో జరిగిన సమావేశంలో ఆయన ఈ వ్యాఖ్యలు చేశారు. ఈ సమావేశంలో ముఖ్యమంత్రి రేవంత్ రెడ్డి, ఫాక్స్‌కాన్‌ను హైదరాబాద్‌లో పెట్టుబడులు పెట్టేందుకు ఆహ్వానించగా, యాంగ్ లియు కూడా నగరంలో పెట్టుబడులు పెట్టేందుకు ఆసక్తిగా ఉన్నట్లు వెల్లడించారు.
ముఖ్యమంత్రి కార్యాలయం (సీఎంఓ) నుండి విడుదలైన పత్రికా ప్రకటన ప్రకారం, రేవంత్ రెడ్డి హైదరాబాద్ నగరంలోని గొప్ప చరిత్ర, పారిశ్రామిక అవకాశాలు, మరియు పెట్టుబడులకు అనుకూలమైన వాతావరణం గురించి యాంగ్ లియు బృందానికి వివరించారు.
ముఖ్యమంత్రితో సమావేశం సందర్భంగా రేవంత్ రెడ్డి, రాష్ట్రంలో ఆర్థికాభివృద్ధి కోసం ప్రస్తుత ప్రపంచ అవసరాలకు తగినట్లుగా “ఫ్యూచర్ సిటీ” పేరుతో నాలుగో నగరానికి (ఫోర్త్ సిటీ) రూపకల్పన చేస్తున్నామని వివరించారు. ఈ ఫోర్త్ సిటీలో విద్య, వైద్యం, క్రీడలు, ఎలక్ట్రానిక్స్-ఎలక్ట్రికల్ రంగాలు, మరియు స్కిల్ డెవలప్మెంట్ వంటి అంశాలను అభివృద్ధి చేయనున్నట్లు తెలిపారు.
అదనంగా, యువతకు అవసరమైన ఆధునిక నైపుణ్యాలను అందించేందుకు యంగ్ ఇండియా స్కిల్ డెవలప్మెంట్ యూనివర్సిటీని ప్రారంభిస్తున్నట్లు రేవంత్ రెడ్డి తెలిపారు.
ఫాక్స్‌కాన్ ఇప్పటికే తమిళనాడు మరియు కర్ణాటకలోని టాటా ఎలక్ట్రానిక్స్‌తో భాగస్వామ్యం ద్వారా భారతదేశంలో వివిధ ఐఫోన్ మోడల్‌లను ఉత్పత్తి చేస్తున్నట్లు కూడా పేర్కొన్నారు.
హైదరాబాద్‌లో పెట్టుబడులకు ఆసక్తి చూపుతున్న ఫాక్స్‌కాన్, తమ వ్యాపారాన్ని విస్తరించేందుకు మరిన్ని అవకాశాలను అన్వేషిస్తోంది.