అమరావతి: “జన్ ధన్ యోజన” విజయవంతమైన సఫలీకృత పథకం, ఆర్థిక విప్లవానికి నాంది!
ప్రధాన్ మంత్రి జన్ ధన్ యోజన (PMJDY) తన 10వ వార్షికోత్సవాన్ని ఘనంగా జరుపుకుంటోంది.
2014 ఆగస్టు 28న ప్రారంభమైన ఈ పథకం, దేశంలోని పేద ప్రజలకు ఆర్థిక స్వాతంత్య్రం అందించడంలో ప్రధాన పాత్ర పోషించింది.
ప్రధాని నరేంద్ర మోదీ, తన తొలిసారి స్వాతంత్ర్య దినోత్సవ ప్రసంగంలో ఈ పథకాన్ని ప్రకటించారు, దేశవ్యాప్తంగా ఈ పథకాన్ని ప్రజలు ఉత్సాహంగా స్వాగతించారు.
జన్ ధన్ ఖాతాల ప్రాముఖ్యత:
ఆర్థిక మంత్రి నిర్మలా సీతారామన్ మాట్లాడుతూ “ప్రస్తుతానికి 53.13 కోట్ల ఖాతాలు ఉన్నాయి. వీటిలో 80 శాతం ఖాతాలు చురుకుగా ఉన్నాయి. ఈ ఖాతాల్లో రూ. 2.3 లక్షల కోట్ల మేర డిపాజిట్లు ఉన్నాయి. 2015లో మదుపుల సంఖ్య తక్కువగా ఉన్నప్పటికీ, 2024 నాటికి ఇవి రూ. 4,352 గా పెరిగాయి. ముఖ్యంగా, గ్రామీణ ప్రాంతాల్లో ఈ పథకం విస్తృతంగా విస్తరించింది. 66.6 శాతం ఖాతాలు ఈ ప్రాంతాల్లోనే తెరవబడ్డాయి, వీటిలో 29.56 కోట్ల మంది లబ్ధిదారులు ఉన్నారు” అని అన్నారు .
ప్రధాని ఎక్స్ పోస్ట్:
ప్రధాని నరేంద్ర మోదీ, X (మాజీ ట్విట్టర్) లో ఈ పథకం విజయవంతం కావడంపై తన ఆనందాన్ని వ్యక్తం చేస్తూ, “ఈ రోజు చారిత్రాత్మకమైన రోజు. జన్ ధన్ యోజన ప్రారంభించి 10 ఏళ్లు పూర్తయ్యాయి. లబ్ధిదారులందరికీ నా శుభాకాంక్షలు. అహోరాత్రులు కృషి చేసిన ప్రజలందరికీ అభినందనలు. ఈ పథకం కోట్లాది మంది పేద సోదర సోదరీమణులను ఆర్థికంగా బలోపేతం చేయడంలో విజయవంతమైంది” అని అన్నారు.
పథకం ప్రయోజనాలు:
- వడ్డీ లభిస్తుంది: జన్ ధన్ ఖాతాల్లో డిపాజిట్ చేసిన మొత్తానికి వడ్డీ లభిస్తుంది.
- ప్రమాద బీమా: ఖాతా తెరిచిన వెంటనే, రూ. 1 లక్ష ప్రమాద బీమా, రూ. 30,000 జీవిత బీమా లభిస్తుంది.
- అత్యవసర నిధి సౌకర్యం: లబ్ధిదారునికి రూ. 10,000 ఓవర్‌డ్రాఫ్ట్ సౌకర్యం, రూపే డెబిట్ కార్డ్ లభిస్తుంది.
- అదనంగా: అటల్ పెన్షన్ పథకం కింద 6.8 కోట్ల మందికి పెన్షన్ సదుపాయం, 36.14 కోట్ల డెబిట్ కార్డులు, 53,609 కోట్ల రుణాలు అందించడం జరిగింది.
మరిన్ని ఖాతాలు తెరవాలని ప్రణాళిక:
2024 ఆర్థిక సంవత్సరంలో, దాదాపు 3 కోట్ల కొత్త ఖాతాలను తెరవాలని ఆర్థిక మంత్రి నిర్మలా సీతారామన్ ప్రకటించారు. ఈ పథకం వలన డిపాజిట్ల సంఖ్య భారీగా పెరిగిందని, 2024 ఆగస్టు 14 నాటికి రూ. 2,31,236 కోట్లకు పెరిగిందని ఆమె తెలిపారు.
చారిత్రాత్మక విజయం:
జన్ ధన్ యోజన వలన దేశంలోని పేద ప్రజలకు బ్యాంకింగ్ సదుపాయాలు అందుబాటులోకి వచ్చాయి. ఈ పథకం, ఆర్థిక సమర్థతను పెంచడంలో, పేదల ఆర్థిక స్వావలంబనను సాధించడంలో ప్రధాన పాత్ర పోషించింది.