న్యూస్ డెస్క్: బంగారం ధరలు రాకెట్ వేగంతో పెరుగుతున్నాయి. ప్రస్తుతం ప్రపంచమంతా ఆర్థిక ఉత్కంఠ పరిస్థితుల్లో ఉండటంతో, ఈ ధరల పెరుగుదల ఆగకపోవచ్చు. తాజాగా సోమవారం స్వల్పంగా తగ్గినప్పటికీ, బంగారం ధరలు ఇప్పటికీ ఆల్ టైం రికార్డు స్థాయి వద్ద ఉన్నాయి. నిపుణుల అంచనాల ప్రకారం, రాబోయే రోజుల్లో బంగారం ధరలు మరింతగా పెరిగే అవకాశం ఉంది.
ఇప్పటి ధరలు ఎలా ఉన్నాయంటే?
నేడు 24 క్యారెట్ల బంగారం ధర 77,400 రూపాయల వద్ద ఉండగా, 22 క్యారెట్ల బంగారం ధర 70,100 రూపాయలుగా ఉంది. అంతర్జాతీయ పరిణామాలు, ముఖ్యంగా పశ్చిమాసియాలో ఉన్న ఉద్రిక్తతలు, అమెరికా స్టాక్ మార్కెట్లలోని హెచ్చుతగ్గులు బంగారం ధరల పెరుగుదలకు దోహదం చేస్తాయని నిపుణులు పేర్కొంటున్నారు. అమెరికా తాజాగా సిరియా పై చేసిన దాడి తర్వాత ఈ అస్థిరత మరింత పెరిగే అవకాశం ఉంది.
బంగారంలో పెట్టుబడులకు ఆసక్తి
ప్రపంచ వ్యాప్తంగా ఉన్న ఆర్థిక ఉత్కంఠ నేపథ్యంలో, రిస్క్‌లేని పెట్టుబడిగా పేరుపొందిన బంగారంలో పెట్టుబడి పెట్టడానికి ఇన్వెస్టర్లు మొగ్గు చూపుతున్నారు. ప్రస్తుతం అమెరికాలో ఒక ఔన్సు బంగారం ధర 2,700 డాలర్ల వద్ద ఉండటంతో, దేశీయంగా కూడా బంగారం ధరలు పెరుగుతున్నాయి.
వివిధ కారకాలు
భారతదేశంలో పండగ సీజన్ ప్రారంభం కావడంతో, బంగారం ఆభరణాల కొనుగోళ్లు మరింత పెరిగే అవకాశం ఉంది. దసరా, దీపావళి, ధన త్రయోదశి వంటి పండగలు దగ్గరపడుతుండటంతో డిమాండ్ పెరుగుతుంది. దీపావళి నాటికి బంగారం ధర 80 వేల రూపాయలు చేరవచ్చని నిపుణులు అంచనా వేస్తున్నారు.
ఆభరణాలు కొనుగోలు చేస్తున్నారా? జాగ్రత్తగా ఉండండి
నిపుణులు బంగారం ఆభరణాలు కొనుగోలు చేసే వారు తూకం విషయంలో చాలా జాగ్రత్తగా ఉండాలని సూచిస్తున్నారు. ఒక గ్రాము తేడా ఉన్నా, ప్రస్తుత ధరలతో పెద్ద మొత్తంలో నష్టం వచ్చే అవకాశం ఉంది. ముఖ్యంగా, హాల్‌మార్క్‌ బంగారాన్ని మాత్రమే కొనుగోలు చేయాలని, దీనిపై ప్రభుత్వం కూడా నిబంధనలు విధించింది.