హైడ్రా అధికారాల విస్తరణ: హైదరాబాద్ డిజాస్ట‌ర్, రిసోర్స్ మేనేజ్‌మెంట్ అథారిటీ (హైడ్రా)కి రాష్ట్ర ప్ర‌భుత్వం మరింత బ‌లం చేకూర్చింది. గవర్నర్‌ విష్ణుదేవ్ వ‌ర్మ ఆర్డినెన్స్‌కు ఆమోదమివ్వడంతో, హైడ్రాకు విస్తృత అధికారం క‌ల్పిస్తూ రాజ్‌భవన్ నుంచి గెజిట్ విడుద‌ల చేశారు.
ఈ నిర్ణయం హైడ్రా ప‌రిధిలో చేప‌డుతున్న కార్య‌క‌లాపాల‌కు చ‌ట్ట‌బ‌ద్ధ‌త‌ను అందించింది. ఇకపై, హైడ్రా చేపట్టే చర్యలు మరింత శక్తివంతంగా కొనసాగనున్నాయి.
హైడ్రాను ఈ ఏడాది జూన్ 19న సీఎం రేవంత్ రెడ్డి ప్రారంభించారు. సీనియ‌ర్ అధికారి రంగ‌నాథ్‌ను క‌మిష‌న‌ర్‌గా నియ‌మించారు. హైడ్రా కీలక బాధ్యతల్లో చెరువులు, నాలాలు, కుంట‌ల పరిరక్షణ, అక్రమ నిర్మాణాల తొలగింపు, వ‌ర‌దల సమయంలో ప్ర‌జ‌ల ర‌క్షణ వంటి పనులు ఉన్నాయి.
ముఖ్యంగా అక్కినేని నాగార్జునకు చెందిన ఎన్ – క‌న్వెన్ష‌న్ కూల్చివేత తర్వాత హైడ్రా పేరు మరింత ప్రాచుర్యం పొందింది.
హైడ్రా అధికారాలు విస్తరించడంతో, హైదరాబాద్, రంగారెడ్డి, మేడ్చల్‌ మల్కాజిగిరి జిల్లాల పరిధిలోని ప్రాంతాలను కూడా ఈ సంస్థ పర్యవేక్షించనుంది. ప్ర‌భుత్వం నుండి మరింత బలాన్ని పొంది, హైడ్రా ప‌నితీరులో విశేష మార్పులు రావ‌చ్చ‌ని అంచనా వేస్తున్నారు.