ప్రకాష్ రాజ్ Vs. పవన్ కల్యాణ్ – రోజురోజుకూ ముదురుతున్న ట్వీట్ల పోరు!
Internet Desk: తిరుమల లడ్డూ కల్తీ వ్యవహారం ఆంధ్రప్రదేశ్‌లో పెద్ద దుమారం రేపి కాస్త శాంతించిందనుకున్నప్పటికీ, ఈ వివాదం డిప్యూటీ సీఎం పవన్ కళ్యాణ్ (Pawan Kalyan) మరియు నటుడు ప్రకాష్ రాజ్ (Prakash Raj) మధ్య జరిగిన ట్వీట్ల యుద్ధానికి కారణమైంది. బద్రి సినిమా తరహాలో వీరి డైలాగ్ వార్ ఆన్‌లైన్ (X) వేదికగా పతాకస్థాయికి చేరింది.
పవన్-ప్రకాశ్ మధ్య మాటల తూటాలు
తిరుమల లడ్డూ వివాదం నేపథ్యంలో మొదలైన ఈ ట్వీట్ల వార్, ఇప్పుడు తమిళనాడు రాజకీయాల వైపు మళ్లినట్టు కనబడుతోంది. విలక్షణ నటుడు ప్రకాష్ రాజ్, పవన్ కళ్యాణ్‌పై సోషల్ మీడియా వేదికగా వ్యంగ్యంగా పంచ్‌లు పేల్చడమే కాదు, ఎంజీఆర్ (MGR) పట్ల హఠాత్తుగా పవన్ కు ప్రేమ ఎందుకు పుట్టుకొచ్చిందని ప్రశ్నించారు. ఇందుకు స్పందనగా పవన్, గతంలో ఎంజీఆర్‌పై తన కామెంట్ల వీడియోలను ట్యాగ్ చేస్తూ, పురచ్చి తలైవర్ ‘తిరు ఎంజీఆర్’ నుంచి పాఠాలు నేర్చుకున్నానని సమాధానమిచ్చారు.
సీరియస్ ట్వీట్ వార్
ఈ ట్వీట్ల యుద్ధం తీవ్రత చర్చనీయాంశంగా మారింది. ట్వీట్లలో ఎంజీఆర్, సనాతన ధర్మం వంటి అంశాలు ప్రధానంగా ప్రస్తావించబడుతుండటంతో, లడ్డూ వివాదం తమిళనాడు రాజకీయాల వైపు మలుపు తీసుకుంది. ప్రకాష్ రాజ్, పవన్ కళ్యాణ్ ఎంజీఆర్‌ను రాజకీయం కోసం ఉపయోగిస్తున్నారని విమర్శలు గుప్పిస్తూనే, దేవుడు, ధర్మం వంటి విషయాలు రాజకీయాల్లోకి తేవడం మంచిది కాదని అభిప్రాయపడ్డారు.
సోషల్ మీడియాలో స్పందనలు
మొదటిగా, ఎంజీఆర్‌పై పవన్ ప్రేమ హఠాత్తుగా ఎందుకు పుట్టుకొచ్చిందని ప్రకాష్ రాజ్ ఎగతాళిగా ట్వీట్ చేయగా, పవన్ కూడా అదే స్థాయిలో కౌంటర్ ఇస్తూ ఎంజీఆర్ గురించి గొప్పగా మాట్లాడారు. మద్దతుదారులు, నెటిజన్లు ఈ ట్వీట్ల యుద్ధంపై మిశ్రమ స్పందనలను వ్యక్తం చేస్తున్నారు. మరీ ముఖ్యంగా మెగా ఫ్యామిలీ అభిమానులు ప్రకాష్ రాజ్ వ్యంగ్యపూరిత వ్యాఖ్యలను తీవ్రంగా వ్యతిరేకిస్తున్నారు.
అసలు సమస్య ఏమిటి?
ఇద్దరి మధ్య ఈ ట్వీట్ల యుద్ధం వ్యక్తిగత స్థాయికి దారితీస్తోంది. ‘మా’ ఎన్నికల సమయంలో ఇండస్ట్రీ మొత్తం ప్రకాష్ రాజ్ ను వ్యతిరేకించి, మెగా ఫ్యామిలీ మాత్రమే మద్దతు ఇచ్చినా, ఇప్పుడు ఆయన పవన్‌పై వ్యక్తిగత విమర్శలు సంధించడం చర్చనీయాంశమైంది. నెటిజన్లు ఇద్దరి మధ్య ఈ వివాదం ఎక్కడివరకు వెళ్తుందో అని ఆసక్తిగా గమనిస్తున్నారు.