అమెరికా అధ్యక్ష ఎన్నికల సమయం దగ్గరపడుతున్న వేళ ప్రచారంలో జోరు పెంచుతున్న రిపబ్లికన్ అభ్యర్థి, మాజీ అధ్యక్షుడు డొనాల్డ్ ట్రంప్, తాజాగా న్యూయార్క్‌లో జరిగిన ఆల్ స్మిత్ ఛారిటీ డిన్నర్‌లో పాల్గొని ప్రసంగించారు. ఈ సందర్భంగా “వైట్ డ్యూడ్స్ ఫర్ హారిస్” అనే గ్రూపును లక్ష్యంగా చేసుకుని ట్రంప్ తనదైన శైలిలో వ్యంగ్యంగా వ్యాఖ్యలు చేశారు.
కమలా హారిస్ ప్రచారానికి మద్దతుగా ఏర్పడిన ఈ గ్రూపుపై ట్రంప్ మాట్లాడుతూ, “వారి భార్యలు, ప్రేమికులు మాత్రం నాకే ఓటు వేస్తారు” అంటూ వ్యాఖ్యానించారు. దీనిపై కొందరు ట్రంప్ మార్కు వెటకారంగా చెబుతుండగా, మరికొందరు మాత్రం ఈ వ్యాఖ్యలను వంకరగా భావిస్తున్నారు.
“వైట్ డ్యూడ్స్ ఫర్ హారిస్” గ్రూపు కమలా హారిస్ ప్రచారానికి శ్వేతజాతీయుల మద్దతును పెంచడం లక్ష్యంగా పెట్టుకుంది. రాస్ మోరల్స్ రాకెట్టో ఆధ్వర్యంలో ఏర్పడిన ఈ టీమ్ ఇప్పటికే 2,00,000 మందికి పైగా పురుషులను చేరదీసింది. ప్రధానంగా పెన్సిల్వేనియా, మిచిగాన్, విస్కాన్సిన్ వంటి కీలక రాష్ట్రాల్లోని ట్రంప్ పాలనతో విసిగిన ఓటర్లను ఆకర్షించే పనిలో ఉంది.
ఈ నేపథ్యంలోనే ట్రంప్ తన ప్రత్యర్థులపై తాను కొట్టిన వ్యాఖ్యలు నవ్వును పంచినా, ఆ వ్యాఖ్యల వెనుకున్న వ్యంగ్యం తేలియాడుతుంది. రానున్న ఎన్నికల్లో ఈ టీమ్ ప్రభావం చూపుతుందా లేదా అన్నదే చూస్తుంటే ఆసక్తికరంగా మారుతోంది.