ఏపీ: డిప్యూటీ సీఎం పవన్ కల్యాణ్ వైఎస్ రాజశేఖర్ రెడ్డి కుటుంబంపై సంచలన ఆరోపణలు చేశారు. గుంటూరు జిల్లాలోని స‌ర‌స్వ‌తి ప‌వ‌ర్ అండ్ ఇండ‌స్ట్రీస్‌కు కేటాయించిన భూములు జగన్, షర్మిల మధ్య ఆస్తి వివాదంలో కీలకంగా మారాయని పవన్ తెలిపారు.
వైఎస్ హయాంలో 30 ఏళ్ల లీజుకు కేటాయించిన ఈ భూములను జగన్ అధికారంలోకి వచ్చాక మ‌రో 50 ఏళ్ల‌కు పొడిగించుకున్నారని పవన్ ఆరోపించారు. దీనిపై విచారణకు ఆదేశించారు.
ఈ భూములను ప్రాజెక్టు పేరుతో ప్రజల నుంచి బలవంతంగా తీసుకున్నారని, స్థానికులకు ఉపాధి అవకాశాలు ఇవ్వకపోవడం వల్ల వారు తీవ్ర ఇబ్బందులు ఎదుర్కొంటున్నారని పవన్ ఆవేదన వ్యక్తం చేశారు.
అటవీ శాఖకు సంబంధించిన 400 ఎకరాల భూమిని రెవెన్యూ భూమిగా మార్చారని, ఇది జగన్ ప్రభుత్వం చేసిన పెద్దమొత్తం దోపిడీకి ఉదాహరణ అని పవన్ అభిప్రాయపడ్డారు.
పవన్ మీడియాతో మాట్లాడుతూ, “ప్రజల భూములను దోచుకుని, వాటిని ప్రైవేటు ప్రాజెక్టుల కోసం వాడుకోవడం అప్రజాస్వామికం. ఈ భూములను తీసుకోవడం ద్వారా ప్రజలకు కష్టం కలిగింది. అందుకే, విచారణ జరిపి పూర్తి వివరాలు ప్రజలకు తెలియజేస్తాం,” అని పేర్కొన్నారు.