ఆఫ్ఘనిస్థాన్: క్రికెటర్ రహ్మానుల్లా గుర్బాజ్ అద్భుత ప్రతిభతో వన్డే క్రికెట్‌లో కొత్త రికార్డులు సృష్టిస్తున్నాడు. బంగ్లాదేశ్‌తో సోమవారం జరిగిన మ్యాచ్‌లో గుర్బాజ్ తన ఎనిమిదవ వన్డే శతకాన్ని బాదడం ద్వారా అత్యంత వేగంగా 8 వన్డే సెంచరీలు సాధించిన రెండవ పిన్న వయస్కుడిగా నిలిచాడు.
22 సంవత్సరాల వయసులో ఈ ఫీట్ సాధించడం ద్వారా అతను సచిన్ టెండూల్కర్, విరాట్ కోహ్లీ, బాబర్ ఆజంలను వెనక్కి నెట్టి రికార్డుల జాబితాలో రెండో స్థానాన్ని దక్కించుకున్నాడు.
ఈ జాబితాలో దక్షిణాఫ్రికా క్రికెటర్ క్వింటన్ డి కాక్ మొదటి స్థానంలో నిలిచాడు. ఇక విరాట్ కోహ్లీ 23 ఏళ్ల వయసులో 8వ వన్డే శతకాన్ని సాధించగా, పాకిస్థాన్ క్రికెటర్ బాబర్ ఆజం 23 ఏళ్ల వయసులో ఈ ఘనతను అందుకున్నాడు.
మూడో వన్డేలో బంగ్లాదేశ్‌పై 101 పరుగుల శతకం చేసిన గుర్బాజ్, ఆఫ్ఘనిస్థాన్ జట్టుకు 5 వికెట్ల తేడాతో విజయాన్ని అందించాడు. ఈ ఇన్నింగ్స్‌ ద్వారా ఆఫ్ఘనిస్థాన్ వన్డే సిరీస్‌ను కూడా కైవసం చేసుకుంది. అలాగే వన్డేల్లో అత్యధిక శతకాలు సాధించిన ఆఫ్ఘన్ క్రికెటర్‌గా గుర్బాజ్ కొనసాగుతున్నాడు.
ఆఫ్ఘనిస్థాన్ క్రికెట్‌లో గుర్బాజ్ రికార్డు ప్రతిభతో తన స్థానాన్ని మరింత బలోపేతం చేస్తూ, జాతీయ జట్టును విజయవంతంగా ముందుకు తీసుకెళ్తున్నాడు.