సోషల్ మీడియా పోస్టులపై కేసుల విషయంలో ఏపీ హైకోర్టు కీలక వ్యాఖ్యలు
ఆంధ్రప్రదేశ్‌లో సోషల్ మీడియాలో అసభ్యకర పోస్టులు పెట్టేవారిపై పోలీసులు కేసులు పెడితే తప్పేముందని ఏపీ హైకోర్టు ప్రశ్నించింది. న్యాయమూర్తులను కూడా అవమానించేలా పోస్టులు ఉన్నాయని, ఈ పరిస్థితిలో పోలీసుల చర్యలను నిలువరించేలా ఎలాంటి ఉత్తర్వులు ఇవ్వలేమని స్పష్టం చేసింది.
సోషల్ మీడియా యాక్టివిస్టులపై పోలీసులు మూకుమ్మడిగా కేసులు నమోదు చేస్తున్నారంటూ జర్నలిస్టు విజయబాబు హైకోర్టులో పిల్ వేశారు. పిల్‌పై ఇవాళ విచారణ జరగ్గా, హైకోర్టు ధర్మాసనం సామూహిక కేసులు పెట్టడంపై అభ్యంతరం వ్యక్తం చేయడంపై అసహనం వ్యక్తం చేసింది.
కేసులపై అభ్యంతరాలున్న వారు నేరుగా కోర్టును ఆశ్రయించవచ్చని, దీనికి పిల్ వేయడం తగదని పేర్కొంది. అసభ్యకర పోస్టులపైనా, చట్టానికి అనుగుణంగా చర్యలు తీసుకోవడంలో పోలీసులు స్వేచ్ఛగా ఉండాలని హైకోర్టు అభిప్రాయపడింది.
అదనంగా, పోలీసుల చర్యలను నిలువరించే బ్లాంకెట్ ఉత్తర్వులను ఇవ్వడం సాధ్యం కాదని, కేసులు వ్యక్తిగతంగా కోర్టు ముందు సవాలు చేయవచ్చని హైకోర్టు వెల్లడించింది. కేసుల విచారణను సత్వరమే పూర్తి చేస్తామని ధర్మాసనం తెలిపింది.