నిజాం కూడా ఇలా చేయలేదు: ఐఏఎస్ అమోయ్ కుమార్ పై హైకోర్టు ఘాటు వ్యాఖ్యలు

నిజాం కూడా ఇలా చేయలేదు అంటూ ఐఏఎస్ అమోయ్ కుమార్ పై హైకోర్టు ఘాటు వ్యాఖ్యలు చేసింది.

హైదరాబాద్: తెలంగాణ రాష్ట్రంలో భూదాన్ భూముల రక్షణలో అధికారుల వైఫల్యంపై హైకోర్టు తీవ్ర అసంతృప్తి వ్యక్తం చేసింది. వివాదాస్పద ఐఏఎస్ అధికారి డి. అమోయ్ కుమార్ పై కోర్టు సంచలన వ్యాఖ్యలు చేస్తూ, నిజాం కూడా భూములను ఆయనలా కట్టబెట్టలేదని అభిప్రాయపడింది. భూదాన్ భూముల పరిరక్షణలో అమోయ్ సహా మరికొందరు అధికారులు విఫలమయ్యారని కోర్టు ఆగ్రహం వ్యక్తం చేసింది.

గత అధికారులపై కోర్టు ఆగ్రహం

భూదాన్ భూముల రక్షణలో విఫలమవుతూ, అధికారుల వివిధ నిర్ణయాలను న్యాయస్థానం తీవ్రంగా విమర్శించింది. గతంలో రంగారెడ్డి జిల్లా కలెక్టర్‌గా ఉన్న అమోయ్ కుమార్ భూదాన్ భూముల విషయంలో వరసపత్రాలను అనధికారికంగా జారీ చేయడంపై హైకోర్టు ఆశ్చర్యం వ్యక్తం చేసింది.

నిజాం పాలనే నయం

నిజాం పాలనలో భూములను “దివానీ, సర్ఫేకాజ్, పట్టాలు” వంటి మూడు వర్గాలుగా గుర్తించడం అభినందనీయమని కోర్టు వ్యాఖ్యానించింది. భూదాన్ భూములకు సంబంధించి అధికారుల బాధ్యతలపై సుప్రీం కోర్టు రాజ్యాంగ ధర్మాసనం సయ్యద్ యాకూబ్ కేసులో ఇచ్చిన తీర్పును కోర్టు ప్రస్తావించింది.

రామచంద్రా రెడ్డి దాతృత్వం

పేదల సంక్షేమం కోసం రామచంద్రా రెడ్డి ఇచ్చిన 300 ఎకరాల భూదాన్ భూములను అధికారులు స్వయంగా తమ స్వార్థానికి ఉపయోగించుకున్నారన్న ఆరోపణలు ఉన్నాయి. అలాగే, పీవీ నరసింహారావు అగ్రికల్చరల్ సీలింగ్ చట్టం అమలు సమయంలో 500 ఎకరాల భూమిని స్వచ్చందంగా ఇచ్చిన విషయాన్ని కోర్టు గుర్తు చేసింది.

ఖాదర్ ఉన్నీసా బేగం కంటెస్టు

రంగారెడ్డి జిల్లా మహేశ్వరం మండలం నాగారం గ్రామం సర్వే నం.182 లో ఖాదర్ ఉన్నీసా బేగంకు 10.92 ఎకరాల భూదాన్ భూమిపై వారసత్వ ధ్రువీకరణ పత్రం జారీ చేయడంపై నవాబ్ ఫరూక్ అలీఖాన్ హైకోర్టులో పిటిషన్ దాఖలు చేశారు.

ఈ కేసులో హైకోర్టు, యథాతథస్థితి కొనసాగించాలంటూ మధ్యంతర ఉత్తర్వులు ఇచ్చింది. దీని పై జస్టిస్‌ సీవీ భాస్కర్‌ రెడ్డి విచారణ చేపట్టారు. పిటిషనర్‌ తరపు న్యాయవాది వాదనలు వినిపిస్తూ గతంలో ఈ భూములను భూదాన్‌ భూములుగా ఆర్డీవో ఆదేశాలివ్వగా, స్పెషల్‌ ట్రైబ్యునల్‌ సమర్థించిందన్నారు.

అందుకు విరుద్దంగా ట్రైబ్యునల్‌ కు నేతృత్వం వహించిన అధికారి కలెక్టర్‌ హోదాలో ఖాదర్‌ హున్సీసా బేగం ఇచ్చిన దరఖాస్తును ఆమోదించి పట్టాదారు పాస్‌ బుక్‌ జారీ చేశారన్నారు. అంతే గాకుండా భూదాన్‌ భూములకు సంబంధించి యథాతథస్థితి కొనసాగించాలంటూ హైకోర్టు మధ్యంతర ఉత్తర్వులు జారీ చేసినా పట్టించుకోలేదన్నారు.

విచారణకు హాజరు కావాలని నోటీసులు

ప్రస్తుత కేసులో రెవెన్యూ శాఖ ముఖ్య కార్యదర్శి, భూదాన్ యజ్ఞబోర్డు, అమోయ్ కుమార్, అప్పటి డీఆర్‌వో ఆర్పీ జ్యోతి సహా మరో ఇద్దరు ప్రైవేట్ వ్యక్తులకు హైకోర్టు నోటీసులు జారీ చేసింది. విచారణ 28వ తేదీకి వాయిదా వేస్తూ పూర్తి వివరాలతో కౌంటర్లు దాఖలు చేయాలని కోర్టు ఆదేశించింది.