మూవీడెస్క్: మట్కా ! టాలెంటెడ్ డైరెక్టర్ కరుణ కుమార్ ‘పలాస 1978’ సినిమాతో టాలీవుడ్‌లో డైరెక్టర్‌గా మంచి గుర్తింపు తెచ్చుకున్నారు.
నేటివిటీ కలిగిన కథ, రియలిస్టిక్ మేకింగ్‌తో ప్రేక్షకుల నుంచి ప్రశంసలు అందుకున్న ఈ చిత్రం తర్వాత, కరుణ కుమార్ స్థాయి మరింత పెరిగింది.
అయితే ‘శ్రీదేవి సోడా సెంటర్,’ ‘కళాపురం’ వంటి చిత్రాలు వరుసగా ఫ్లాప్ అవ్వడంతో ఆయనకు బ్యాడ్ ఫేజ్ మొదలైంది.
ఇలాంటి పరిస్థితుల్లోనే వరుణ్ తేజ్ ‘మట్కా’ అనే భారీ బడ్జెట్ చిత్రానికి కరుణ కుమార్ డైరెక్టర్‌గా అవకాశం పొందారు.
పీరియాడిక్ బ్యాక్‌డ్రాప్‌లో సాగే ఈ చిత్రాన్ని రూ. 40 కోట్లకు పైగా బడ్జెట్‌తో వైరా ఎంటర్‌టైన్మెంట్స్ నిర్మించింది.
నవంబర్ 14న విడుదలైన ఈ చిత్రం మొదటి ఆట నుంచే డివైడ్ టాక్‌ను మూటగట్టుకుంది.
వరుణ్ తేజ్ మూడు విభిన్న పాత్రల్లో తన నటనతో మెప్పించాడని ప్రేక్షకులు అంటున్నా, కథ, కథనం, స్క్రీన్‌ప్లే పరంగా సినిమా ప్రేక్షకులను అలరించలేకపోయింది.
పీరియాడిక్ డ్రామా అంటేనే విభిన్నమైన మ్యూజిక్, ఇన్‌టెన్స్ స్క్రీన్‌ప్లే అవసరం. అయితే ఈ అంశాల్లో ‘మట్కా’ ఘోరంగా విఫలమైంది.
కరుణ కుమార్ కథ విషయంలో మరోసారి అదే తప్పు చేశారని పరిశీలకులు అభిప్రాయపడుతున్నారు.
జనాలను థియేటర్లకు రప్పించేందుకు సరైన ప్రమోషన్స్ జరగకపోవడం కూడా ఈ సినిమా ఓపెనింగ్స్‌పై ప్రభావం చూపింది.
గతంలో ‘పలాస 1978’లో నెక్లేసు గొలుసు పాట సినిమాకు క్రేజ్ తీసుకురాగా, ‘మట్కా’కు ఆ స్థాయి మ్యూజిక్ లేదు.
తదుపరి ప్రాజెక్ట్‌లో కరుణ కుమార్ కథ, కథనంపై మరింత శ్రద్ధ తీసుకుంటేనే ఆయన తిరిగి ఫామ్‌లోకి రావడం సాధ్యమని విశ్లేషకులు సూచిస్తున్నారు.