తెలంగాణ: ప్రభుత్వం ప్ర‌జా గాయ‌కుడు గద్దర్ కుటుంబానికి మరింత గౌరవం అందజేసింది. గద్దర్ కుమార్తె వెన్నెలను తెలంగాణ సాంస్కృతిక సారథి చైర్‌పర్సన్‌గా నియమిస్తూ ఉత్తర్వులు జారీ చేసింది.
వెన్నెలకు ఈ పదవి కేటాయించడం ద్వారా తెలంగాణ సాంస్కృతిక కార్యక్రమాలను విస్తృతంగా ప్రచారం చేయడానికి అవకాశం కల్పించారు. ప్రభుత్వ పథకాలు, సంక్షేమ కార్యక్రమాలను ప్రజల వరకు చేర్చడంలో ఈ బాధ్యత కీలకంగా ఉంటుంది.
గద్దర్ కుటుంబానికి రాజకీయ, సామాజిక రంగాల్లో ఎనలేని గుర్తింపు ఉంది. 2023లో కాంగ్రెస్ పార్టీ తరఫున కంటోన్మెంట్ అసెంబ్లీ టికెట్ కేటాయించినప్పటికీ వెన్నెల ఓటమి పాలయ్యారు.
అయినప్పటికీ, గద్దర్ కుటుంబానికి సంబంధించిన వారిని ప్రోత్సహించడంలో తెలంగాణ సర్కారు ఎల్లప్పుడూ ముందుంది. సీఎం రేవంత్ రెడ్డి ప్రభుత్వం వెన్నెలకు ఈ పదవిని ఇవ్వడం గద్దర్ కుటుంబం పట్ల గౌరవాన్నిచ్చినట్లుగా ప్రజలు భావిస్తున్నారు.
ప్రజల గాయాల్ని తన పాటల ద్వారా చాటి చెప్పిన గద్దర్ తన జీవితంలో ఎన్నో ఉద్యమాలకు, పోరాటాలకు నడిపించారు. ప్రత్యేక తెలంగాణ కోసం జరిగిన పోరాటంలో గద్దర్ పాత్ర అనితర సాధ్యం.
రాజ‌కీయాల్లో కూడా గద్దర్ పలు మార్గాల్లో ప్రయత్నించినా, రాజకీయ ఒత్తిడుల కారణంగా పూర్తిగా స్థిరపడలేకపోయారు. ఆయన మరణం అనంతరం వెన్నెల రాజకీయ రంగంలో అడుగుపెట్టి కాంగ్రెస్ పార్టీకి ప్రాతినిధ్యం వహించారు.
వెన్నెలకు సాంస్కృతిక సారథి బాధ్యతలు అప్పగించడంపై తెలంగాణలో ప్రజలు సంతోషం వ్యక్తం చేస్తున్నారు. గద్దర్ కుటుంబం ప్రజల గుండెల్లో ఎప్పటికీ స్థానం దక్కించుకున్నట్లు, ఈ నిర్ణయం వారికి మరింత గౌరవాన్ని తెచ్చిపెట్టింది.