ఏపీ: వైసీపీ నేత, సినీ నటుడు పోసాని కృష్ణ మురళి రాజకీయాలకు గుడ్‌బై చెప్పడం రాజకీయ వర్గాల్లో సంచలనం రేపింది. చంద్రబాబు, పవన్ కల్యాణ్, లోకేష్‌లపై పోసాని చేసిన అసభ్యకర వ్యాఖ్యలు గతంలో తీవ్ర విమర్శలకు దారితీశాయి.
ఆ వ్యాఖ్యలపై రాష్ట్ర వ్యాప్తంగా కేసులు నమోదు కావడంతో పోసాని తన రాజకీయ జీవితంపై కీలక నిర్ణయం తీసుకున్నారు. తన కుటుంబం కోసం ఇకపై పూర్తిగా సమయం కేటాయిస్తానని, ఎలాంటి రాజకీయ వ్యాఖ్యలు చేయబోనని పోసాని తెలిపారు.
ఎవరిని విమర్శించటం లేదని, పొగడటం కూడా చేయనని స్పష్టం చేశారు. ఈ నిర్ణయం తనకు తానే తీసుకున్నానని, పార్టీ లేదా వ్యక్తుల ఒత్తిడితో తీసుకోలేదని ఆయన వివరించారు.
గతంలో అన్ని పార్టీలను సమానంగా విమర్శించినప్పటికీ, ఇకపై రాజకీయ విమర్శలకు దూరంగా ఉంటానని పేర్కొన్నారు. సమాచారం ప్రకారం, పోసాని తన నిర్ణయానికి వైసీపీ నేతల నిర్లక్ష్యం కూడా కారణమని నెటిజన్లు అభిప్రాయపడుతున్నారు.
గతంలో రాజకీయ వ్యాఖ్యలతో ఆయనకు ఎదురైన కేసుల్లో వైసీపీ సరైన మద్దతు ఇవ్వలేదని, దాంతోనే పోసాని రాజకీయాలకు దూరంగా ఉండాలని నిర్ణయించుకున్నారని సోషల్ మీడియాలో చర్చ జరుగుతోంది.
తన నిర్ణయం ద్వారా కుటుంబ జీవితానికి ప్రాధాన్యం ఇవ్వాలని భావిస్తున్నానని, ఇకపై రాజకీయాలపై స్పందించబోనని పోసాని తెలిపారు. పోసాని ప్రకటనతో రాజకీయ వర్గాలు, ఆయన అభిమానులు ఆశ్చర్యానికి గురయ్యారు.