మూవీడెస్క్: ప్రఖ్యాత సంగీత దర్శకుడు ఏఆర్‌ రెహమాన్ ఇటీవల తన వైవాహిక బంధం ముగిసినట్లు ప్రకటించడం అందరినీ షాక్‌కు గురి చేసింది.
29 ఏళ్ల పాటు తన భార్య సైరా భానుతో ఉన్న బంధానికి అనుకోని ముగింపు చెప్పాల్సి వచ్చినట్లు తెలిపారు.
ఈ ప్రకటనతో ఫ్యాన్స్‌ తీవ్ర దిగ్భ్రాంతికి గురయ్యారు.
ఇలాంటి సమయంలో రెహమాన్ టీమ్‌ సభ్యురాలు మోహిని దే కూడా తన భర్తతో విడిపోతున్నట్లు ప్రకటించడంతో, ఈ రెండు ఘటనల మధ్య సంబంధం ఉందంటూ సోషల్ మీడియాలో ఊహాగానాలు వేగంగా పాకాయి.
అయితే, సైరా భాను తరఫున న్యాయవాది స్పందిస్తూ, ఈ రూమర్స్‌ అసత్యమని, రెహమాన్ దంపతులు పరస్పర అంగీకారంతో విడిపోవాలని నిర్ణయించుకున్నారని స్పష్టంచేశారు.
తాజాగా రెహమాన్ కుమారుడు అమీన్‌ సోషల్ మీడియాలో ఎమోషనల్‌ పోస్ట్‌ చేశారు.
తండ్రిపై వస్తున్న తప్పుడు వార్తలు తనను బాధిస్తున్నాయని, రెహమాన్ ఒక లెజెండ్‌గా ఎంతో మంది ప్రేమను పొందారని తెలిపారు.
రూమర్స్‌ సృష్టించకుండా, ఆయన వ్యక్తిత్వాన్ని గౌరవించాలని అభ్యర్థించారు.
మరోవైపు, రెహమాన్ కూతురు రహీమా కూడా ఇంగ్లీష్‌లో ఓ కొటేషన్‌ షేర్‌ చేస్తూ, “ద్వేషించే వారు రూమర్స్‌ క్రియేట్ చేస్తారు, తెలివితక్కువ వారు వ్యాప్తి చేస్తారు,” అంటూ తన భావాలను వ్యక్తపరిచారు.
ఇదిలా ఉంటే, రెహమాన్ కుటుంబానికి మద్దతుగా ఫ్యాన్స్‌ ధైర్యం చెబుతూ, ఇలాంటి తప్పుడు వార్తలపై స్పందించకూడదని సూచిస్తున్నారు.