హైదరాబాద్: కేంద్ర సహాయ మంత్రి బండి సంజయ్ మహారాష్ట్ర ఎన్నికల ఫలితాలపై స్పందించారు. ఎన్డీయే కూటమి విజయాన్ని ప్రజల అవగాహనకు సంబంధించిన స్పష్టతగా అభివర్ణించారు.
మీడియాతో మాట్లాడుతూ కాంగ్రెస్ అబద్ధాల రాజకీయాలను ప్రజలు తిరస్కరించారని అన్నారు. మహారాష్ట్ర ప్రజల చైతన్యం ఎన్డీయే విజయానికి దోహదం చేసిందని చెప్పారు.
తెలంగాణ ఎన్నికలపై మహారాష్ట్ర ఫలితాలు ప్రభావం చూపుతాయని బండి సంజయ్ అభిప్రాయపడ్డారు.
కాంగ్రెస్‌లో అంతర్గత విభేదాలు మొదలైపోయాయని, తమ అబద్ధపు హామీలతో ప్రజలను మోసం చేయలేరని అన్నారు.
“మేము ప్రభుత్వం కూల్చడంలో ఆసక్తి చూపం, వారు తాము తప్పుల వల్లే పతనమవుతారు,” అని ఆయన వ్యాఖ్యానించారు.
మహారాష్ట్రలో హిందూ సమాజం ఐక్యతను చాటిచెప్పిందని, ఇదే ఐక్యత తెలంగాణలోనూ కనిపిస్తుందని పేర్కొన్నారు. తెలంగాణ ప్రజలు కాంగ్రెస్ హామీల వెనుక ఉన్న నిజాలను గ్రహించి తగిన నిర్ణయం తీసుకుంటారని అన్నారు.
“కాంగ్రెస్ పార్టీ ఐరన్ లెగ్ పార్టీగా మారింది, ఏ రాష్ట్రంలోనూ నిలవలేకపోతోంది,” అని విమర్శించారు.
కర్ణాటక, తెలంగాణ నుంచి కాంగ్రెస్ మహారాష్ట్రలో ఎన్నికల నిధులు పంపిందని ఆరోపించారు. కాంగ్రెస్ మూడు రాష్ట్రాల్లో ప్రజలకు ఇచ్చిన హామీలను అమలు చేయడంలో విఫలమవుతుందని ప్రజలు ఇప్పటికే తెలుసుకున్నారని అన్నారు.
తెలంగాణలో కూడా కాంగ్రెస్ పార్టీపై అదే విధమైన అసంతృప్తి పెరుగుతోందని వ్యాఖ్యానించారు. ఈవీఎంల ట్యాపరింగ్ ఆరోపణలపై మాట్లాడుతూ, “తెలంగాణ, కర్ణాటకలో కాంగ్రెస్ ఎలా అధికారంలోకి వచ్చింది?” అంటూ ప్రశ్నించారు.
రాబోయే రోజుల్లో కాంగ్రెస్ ప్రభుత్వం పతనాన్ని తెలంగాణ ప్రజలు కూడా చూస్తారని బండి సంజయ్ స్పష్టం చేశారు.