అమరావతి: సోషల్‌ మీడియా కేసులపై హైకోర్టు ఆగ్రహం: రూ.50 వేల జరిమానా
సోషల్‌ మీడియా పోస్టుల విషయంలో పోలీసులు కేసులు నమోదు చేయడంపై ఆంధ్రప్రదేశ్‌ హైకోర్టు కీలక తీర్పు వెలువరించింది.
ఈ అంశాన్ని ప్రతిష్ఠాత్మకంగా తీసుకొని, పిటిషన్‌ దాఖలు చేసిన అధికార భాషా సంఘం మాజీ అధ్యక్షుడు, పాత్రికేయుడు పోలా విజయబాబు తీరుపై ధర్మాసనం తీవ్ర ఆగ్రహం వ్యక్తం చేసింది.
పిటిషన్‌లో రాజకీయ ఉద్దేశ్యం ఉందని కోర్టు అభిప్రాయపడింది. తప్పుడు ఉద్దేశంతో కేసు వేశారని, సమాజంలో భావప్రకటన స్వేచ్ఛను వక్రీకరించే ప్రయత్నం చేశారని ఆరోపిస్తూ విజయబాబుకు రూ.50 వేల జరిమానా విధించింది.
ఈ జరిమానాను ఒక నెలలోపు లీగల్‌ సర్వీసెస్‌ అథారిటీకి చెల్లించాలని కోర్టు ఆదేశాలు జారీ చేసింది.
విచారణ సమయంలో హైకోర్టు వివిధ కీలక వ్యాఖ్యలు చేసింది. సామాజిక మాధ్యమాల్లో 2 వేల మందికి పైగా అసభ్యకర పోస్టులు పెడుతూ, ప్రజలను భయభ్రాంతులకు గురి చేస్తూ చట్టాన్ని అతిక్రమిస్తున్నారని కోర్టు తీవ్రంగా ప్రశ్నించింది.
పోలీసులు చట్టం ప్రకారం వారిపై చర్యలు తీసుకుంటే, దానికి తప్పేముందని న్యాయస్థానం నిలదీసింది.
వందల మంది ఒకే విధమైన అభ్యంతరకర పోస్టులు పెడుతుంటే, వారిపై చర్యలు తీసుకోవడం ప్రభుత్వం బాధ్యత అని కోర్టు స్పష్టం చేసింది.
పోలీసుల తీరును తప్పుబట్టే స్థానంలో, అసభ్యకర పోస్టులు పెడుతున్నవారిపై చర్యలు తీసుకోవడం సముచితమని కోర్టు అభిప్రాయపడింది.
ఈ పిటిషన్‌లో విజయబాబుకు మద్దతుగా సీనియర్‌ న్యాయవాది ఎస్‌. శ్రీరామ్ వాదనలు వినిపించారు.
వైఎస్ఆర్‌సీపీ ప్రభుత్వంలో ఏజీగా పని చేసిన శ్రీరామ్, పోలీసుల చర్యలు ప్రజాస్వామ్య విలువలకు విరుద్ధమని వాదించారు.
అయితే ఈ వాదనలను ధర్మాసనం నిరాకరించింది.
పోలా విజయబాబు తరచూ టీవీ చర్చల్లో పాల్గొంటూ వైకాపాకు అనుకూలంగా వ్యాఖ్యలు చేయడం తెలిసిందే.
ఇదే విషయాన్ని కోర్టు పరిశీలిస్తూ, ఈ పిటిషన్‌ వెనుక రాజకీయ ఉద్దేశాలు ఉన్నాయని స్పష్టంగా పేర్కొంది.
కోర్టు తీర్పు సమాజంలో సోషల్‌ మీడియా బాధ్యతలను గుర్తుచేస్తూ, స్వేచ్ఛను తప్పుడు మార్గాల్లో వినియోగించరాదని పరోక్ష సందేశాన్ని ఇచ్చింది.