తెలంగాణ :రేవంత్ రెడ్డి: రుణమాఫీ విషయంలో రేగుతున్న రాజకీయ దుమారం మరో మలుపు తీసుకుంది. బీఆర్ఎస్, బీజేపీ నేతలు కాంగ్రెస్ ప్రభుత్వంపై రైతులను మోసం చేసిందని ఆరోపణలు చేసింది.
ముఖ్యమంత్రి రేవంత్ రెడ్డి ప్రధాని మోదీ, మాజీ సీఎం కేసీఆర్‌లను చర్చకు సవాల్ చేశారు. రుణమాఫీపై మీరు సిద్ధమా అంటూ ఆయన ప్రశ్నించారు.
రైతు బిడ్డగా పాలమూరు రైతుల కష్టాలు తనకు తెలుసని, రైతులు ప్రతిపక్షాల ట్రాప్‌లో పడొద్దని రేవంత్ పేర్కొన్నారు. భూసేకరణ అభివృద్ధికి అవసరమని, కేసీఆర్ కుటుంబం ఫామ్ హౌస్‌ల సౌకర్యాల్లో ఉంటూ ప్రజల్ని రెచ్చగొడుతోందని విమర్శించారు.
కేటీఆర్, హరీశ్ రావులపై తీవ్ర వ్యాఖ్యలు చేస్తూ, వారి మాటలు నమ్మి అభివృద్ధిని అడ్డుకోవద్దని ఆయన సూచించారు.
మూడు సంవత్సరాల కిందట కాళేశ్వరం ప్రాజెక్టు కూలిపోయిందని ఎద్దేవా చేసిన రేవంత్, రాష్ట్రంలో కాంగ్రెస్ ప్రభుత్వం రికార్డు స్థాయిలో రూ. 21 వేల కోట్ల రుణమాఫీ చేసినట్లు తెలిపారు.
25 లక్షల రైతు కుటుంబాలకు మేలు చేయడంలో తమ ప్రభుత్వం ముందున్నట్లు పేర్కొన్నారు. పాలమూరును అభివృద్ధి చేసేందుకు తనకు వచ్చిన అవకాశాన్ని పూర్తి బాధ్యతగా నిర్వహిస్తున్నానని రేవంత్ చెప్పారు.
తెలంగాణ రైతు సమస్యలు, రాజకీయ ఆరోపణల నడుమ రుణమాఫీ అంశం చర్చనీయాంశంగా మారింది. రేవంత్ రెడ్డి చేసిన వ్యాఖ్యలు రాజకీయ వర్గాల్లో ఆసక్తి రేకెత్తిస్తున్నాయి.