మూవీడెస్క్: సంధ్య థియేటర్ దుర్ఘటన కేసులో నటుడు అల్లు అర్జున్ అరెస్ట్ కావడం, ఆ తరువాత బెయిల్ రావడం అందరిని ఆశ్చర్యానికి గురి చేసింది.
పుష్ప-2 ప్రీమియర్ షో సమయంలో జరిగిన తొక్కిసలాటలో రేవతి అనే మహిళ మరణించడం తెలిసిందే.
ఈ ఘటనకు సంబంధించి అల్లు అర్జున్, ఆయన టీమ్‌తో పాటు థియేటర్ యాజమాన్యంపై చిక్కడపల్లి పోలీసులు కేసు నమోదు చేసి, నేడు అల్లు అర్జున్‌ను అరెస్ట్ చేశారు.
ఈ అరెస్ట్‌పై టాలీవుడ్ హీరో నాని తన అభిప్రాయం వ్యక్తం చేశారు. ఈ ఘటన చాలా బాధాకరమని, అలాంటి పరిస్థితులు పునరావృతం కాకుండా జాగ్రత్తలు తీసుకోవాలని సూచించారు.
“ఒక వ్యక్తినే లక్ష్యంగా చేసుకోవడం సరైన పద్ధతి కాదు,” అని నాని వ్యాఖ్యానించారు.
ప్రజల భద్రతపై మరింత దృష్టి పెట్టాల్సిన అవసరం ఉందని, అందరి తప్పు కలసి ఉందని ఆయన అన్నారు.
నాని సోషల్ మీడియా ద్వారా ప్రభుత్వ అధికారుల పనితీరుపై ప్రశ్నలు లేవనెత్తారు.
“సినీ పరిశ్రమకు సంబంధించినవారిపై చూపిస్తున్న ఉత్సాహం, సాధారణ పౌరుల భద్రతపై ఎందుకు ఉండటం లేదు?” అని నాని ప్రశ్నించారు.
ఈ ఘటన బాధాకరమైన పాఠాలు నేర్పిందని, భవిష్యత్తులో ఇటువంటి ఘటనలు జరగకుండా చర్యలు తీసుకోవాలని సూచించారు.
అల్లు అర్జున్ అరెస్ట్‌పై నాని మాత్రమే కాకుండా పలువురు సినీ ప్రముఖులు తమ అభ్యంతరం వ్యక్తం చేశారు.
“సినిమా విడుదలకు సంబంధించి అన్ని కార్యక్రమాలు నిర్వహించేవారు అందరూ బాధ్యత వహించాలి.
ఇలాంటి సమయంలో న్యాయబద్ధమైన విచారణ అవసరం,” అని వారు అభిప్రాయపడ్డారు.