హైదరాబాద్: ఫార్ములా ఈ-కార్ రేసింగ్ వ్యవహారంలో బీఆర్ఎస్ వర్కింగ్ ప్రెసిడెంట్ కేటీఆర్‌పై ఈడీ విచారణ కీలక మలుపు తీసుకుంది. ఈడీ అధికారులు కేటీఆర్‌ను దాదాపు 7 గంటల పాటు ప్రశ్నించారు.
అయితే, విచారణ అనంతరం కేటీఆర్ ఇంటికి వెళ్లిపోవడంతో అరెస్ట్ జరుగుతుందని వచ్చిన ఊహాగానాలు విరమించాయి.
ఈ పరిణామంపై సీబీఐ మాజీ జేడీ వీవీ లక్ష్మీనారాయణ స్పందించారు. ఏ దర్యాప్తు సంస్థకైనా అరెస్ట్ చేసే ముందు తగిన కారణాలు, సమర్థన ఉండాలని స్పష్టం చేశారు.
‘‘నిందితుడు దర్యాప్తులో సహకరించకపోతేనే అరెస్ట్ అవసరం వస్తుంది. ఒకవేళ అరెస్ట్ చేస్తే, కోర్టుకు దాన్ని సమర్థించే ఆధారాలు సమర్పించాల్సి ఉంటుంది’’ అని లక్ష్మీనారాయణ తెలిపారు.
విచారణకు ముందు కేటీఆర్ మీడియా సమావేశం నిర్వహించి ఈ కేసు సంబంధించిన అంశాలను స్పష్టంగా వివరించారు. ‘‘రాష్ట్రానికి ప్రయోజనం కలిగే ఉద్దేశంతోనే ఈ వ్యవహారాన్ని చేపట్టాం. ఏ విధమైన నేరపూరిత ఉద్దేశాలు లేవు’’ అని కేటీఆర్ తెలిపారు.
దర్యాప్తు సంస్థలు చేసే ప్రతి చర్యకు కోర్టులో సమర్థత చూపించాల్సి ఉంటుందని లక్ష్మీనారాయణ చెప్పడం గమనార్హం.
ఈ విచారణతో బీఆర్ఎస్ రాజకీయాలపై కొత్త చర్చ ప్రారంభమైంది. మరి ఈడీ నివేదికలో ఎలాంటి సమాచారం వెల్లడవుతుందో వేచి చూడాల్సిందే.