సీఎం చంద్రబాబు అధ్యక్షతన కేబినెట్ సమావేశం

అమరావతి: సీఎం చంద్రబాబు అధ్యక్షతన కేబినెట్ సమావేశం: కీలక నిర్ణయాలకు రూపకల్పన

ముఖ్యమంత్రి చంద్రబాబు నాయుడు నేతృత్వంలో శుక్రవారం ఉదయం 11 గంటలకు ఆంధ్రప్రదేశ్ మంత్రివర్గ సమావేశం జరగనుంది. ఈ భేటీలో పలు ముఖ్యమైన ప్రతిపాదనలపై చర్చించి కీలక నిర్ణయాలు తీసుకునే అవకాశం ఉంది. ప్రధానంగా, గ్రామ, వార్డు సచివాలయాల పునర్నిర్మాణంపై ప్రత్యేకంగా చర్చించనున్నారు.

గ్రామ, వార్డు సచివాలయాల రేషనలైజేషన్
గ్రామ, వార్డు సచివాలయాల్లో ఉద్యోగుల రేషనలైజేషన్‌పై కేబినెట్ ముందుకు ప్రతిపాదనలు వచ్చాయి. 1.27 లక్షల మంది సచివాలయ ఉద్యోగులను సమన్వయం చేయాలని ప్రభుత్వం ప్రణాళికలు రూపొందించింది. కొన్నిసచివాలయాల్లో ఉద్యోగుల అధిక లభ్యత, మరికొన్నింటిలో తక్కువ ఉద్యోగుల సమస్యను పరిష్కరించేందుకు ఈ నిర్ణయం తీసుకోనున్నట్లు సమాచారం.

సూపర్ సిక్స్ పథకాల అమలుపై చర్చ
ప్రజా సంక్షేమానికి అంకితమైన సూపర్ సిక్స్ పథకాల అమలుపై కేబినెట్ సమావేశంలో చర్చ జరిగే అవకాశం ఉంది. ముఖ్యంగా మహిళల ఉచిత బస్సు ప్రయాణ పథకం అమలు, గీత కార్మికులకు 10% మద్యం షాపుల కేటాయింపు వంటి అంశాలపై నిర్ణయాలు తీసుకోనున్నారు.

విశాఖ ఉక్కు ప్యాకేజీకి కేంద్రానికి ధన్యవాదాలు
విశాఖ ఉక్కు పరిశ్రమకు ఉపశమనం కలిగించేలా భారీ ప్యాకేజీని కేంద్రం ప్రకటించిన నేపథ్యంలో, రాష్ట్ర కేబినెట్ ఈ నిర్ణయాన్ని ప్రశంసించనుంది. కేంద్రానికి అధికారికంగా ధన్యవాదాలు తెలపాలని ఈ సమావేశంలో తీర్మానం చేసే అవకాశం ఉంది.

దావోస్ పర్యటనపై ప్రత్యేక చర్చ
సీఎం చంద్రబాబు ఇటీవల దావోస్ పర్యటనను చేపట్టిన సంగతి తెలిసిందే. ఈ పర్యటనకు సంబంధించి మంత్రులతో ప్రత్యేకంగా చర్చలు జరిపే అవకాశం ఉంది. రాష్ట్రంలో పెట్టుబడులు, అభివృద్ధి ప్రణాళికల కోసం చేపట్టిన ఈ పర్యటన ఫలితాలపై ఆలోచన చేయనున్నారు.

భూముల కేటాయింపు, పెట్టుబడులపై నిర్ణయాలు
కేబినెట్ సమావేశంలో వివిధ రంగాల్లో పెట్టుబడులకు సంబంధించి కొత్త ప్రతిపాదనలపై చర్చించనున్నారు. పలు ప్రైవేట్ సంస్థలకు భూముల కేటాయింపు, పరిశ్రమల ప్రోత్సాహంపై కేబినెట్ నిర్ణయాలు తీసుకునే అవకాశం ఉంది.