ముంబై: టీమిండియా కెప్టెన్ రోహిత్ శర్మ తన ఫామ్ లేమి కారణంగా విమర్శలు ఎదుర్కొంటున్న నేపథ్యంలో రంజీట్రోఫీ మ్యాచ్‌లో ముంబై తరఫున ఆడాడు. జమ్ముకశ్మీర్‌తో జరిగిన ఈ మ్యాచ్‌లో రోహిత్ మళ్లీ తీవ్ర నిరాశ పరిచాడు.
ఓపెనర్‌గా బరిలోకి దిగిన రోహిత్ 19 బంతులను ఎదుర్కొని కేవలం 3 పరుగులు చేసి పెవిలియన్ చేరాడు. జమ్ముకశ్మీర్ బౌలర్ ఉమర్ నజీర్ మిర్ వేగానికి తట్టుకోలేక రోహిత్ తక్కువ స్కోర్‌తో అవుట్ అయ్యాడు.
మరోవైపు, ముంబై బ్యాటింగ్ లైనప్ మొత్తం జమ్ముకశ్మీర్ బౌలర్ల ధాటికి తడబడి, జైశ్వాల్ కేవలం 4 పరుగులకే అవుట్ కావడం ముంబైకి మరో ఎదురుదెబ్బగా మారింది.
ఇటీవల ఆస్ట్రేలియాతో టెస్ట్ సిరీస్‌లో రోహిత్ శర్మ విఫలమవడంతో విమర్శలు ఎక్కువయ్యాయి. ఆ సిరీస్‌లో మొత్తం 5 ఇన్నింగ్స్‌లు ఆడిన రోహిత్ కేవలం 31 పరుగులు మాత్రమే చేశాడు.
న్యూజిలాండ్‌తో జరిగిన సిరీస్‌లోనూ రోహిత్ తన గడ్డును కొనసాగించలేకపోయాడు. ఇప్పుడు రంజీట్రోఫీ మ్యాచ్‌లోనూ పేలవ ప్రదర్శనతో రోహిత్ శర్మపై ఒత్తిడి మరింత పెరిగింది.
తన ఫామ్‌ను తిరిగి పొందేందుకు రోహిత్ కొన్ని కీలక మార్పులు చేయాల్సిన అవసరం ఉందని క్రికెట్ విశ్లేషకులు అభిప్రాయపడుతున్నారు. రెడ్ బాల్ క్రికెట్‌లో రోహిత్ శర్మ ఆడిన ప్రతీ మ్యాచ్ ఆయన కెరీర్‌కు కీలకమైనదిగా మారింది.