జాతీయం: యోగీజీ.. యూపీలో విద్యుత్‌ కోతల కథేంటి?: కేజ్రీవాల్‌ కౌంటర్‌
దిల్లీ అసెంబ్లీ ఎన్నికల ప్రచారంలో అధికార ఆమ్‌ ఆద్మీ పార్టీ (ఆప్‌), ప్రతిపక్ష భారతీయ జనతా పార్టీ (బీజేపీ) నేతల మధ్య మాటల తూటాలు పేలుతున్నాయి. యూపీ ముఖ్యమంత్రి యోగి ఆదిత్యనాథ్‌ ఆప్‌ ప్రభుత్వాన్ని టార్గెట్‌ చేస్తూ చేసిన వ్యాఖ్యలపై దిల్లీ ముఖ్యమంత్రి అరవింద్‌ కేజ్రీవాల్‌ గట్టి కౌంటర్‌ ఇచ్చారు.
ఉత్తరప్రదేశ్‌లో కరెంటు కోతలు ప్రస్తావనకు తెచ్చి, యోగి ఆదిత్యనాథ్‌ హయాంలో ఉత్తరప్రదేశ్‌ పరిస్థితులను నిలదీశారు. ‘‘దిల్లీలోని ప్రజలు అందరూ చెబుతున్నారు – 24 గంటల విద్యుత్‌ అందుబాటులో ఉందని. కేవలం ఐదేళ్లలోనే మా ప్రభుత్వం దిల్లీని విద్యుత్‌ కోతల సమస్యల నుంచి బయటపడేలా చేసింది’’ అని కేజ్రీవాల్‌ చెప్పారు.
పశ్చిమ దిల్లీలో హరినగర్‌లో నిర్వహించిన ప్రచార సభలో కేజ్రీవాల్‌ మాట్లాడుతూ, ‘‘యూపీలో డబుల్‌ ఇంజిన్‌ ప్రభుత్వం పదేళ్లుగా అధికారంలో ఉంది కదా! అయినా విద్యుత్‌ సరఫరాలో కోతలపై సమస్యలు ఎందుకు ఎదురవుతున్నాయి? యోగీ జీ, మీ రాష్ట్రంలో ఎన్ని గంటల విద్యుత్‌ కోతలు ఉంటాయో చెప్పగలరా?’’ అంటూ ప్రశ్నించారు.
ఆమ్‌ ఆద్మీ పార్టీ చేపట్టిన అభివృద్ధి పనులు, ముఖ్యంగా విద్యుత్‌ సరఫరాలో చేసిన మార్పులను కేజ్రీవాల్‌ ప్రస్తావించారు. ‘‘మేము దిల్లీలో స్వచ్ఛతకు, అభివృద్ధికి పెద్దపీట వేశాం. విద్యుత్‌ కొరత లేకుండా 24గంటల సౌకర్యం అందిస్తున్నాం. మీరూ అదే చేస్తారా? లేదా కేవలం విమర్శలతోనే సరిపెట్టుకుంటారా?’’ అని విమర్శించారు.
ఇదే సమయంలో యోగి ఆదిత్యనాథ్‌ దిల్లీని డంపింగ్‌ యార్డ్‌గా మార్చేశారని చేసిన ఆరోపణలను కూడా కేజ్రీవాల్‌ ఖండించారు. ‘‘దిల్లీ ప్రజల కోసం పనిచేస్తున్నాం. విద్యుత్‌, నీటి సమస్యలు పూర్తిగా తొలగించాం. ఏకకాలంలో మహిళల భద్రత, రవాణా, ఆరోగ్యం వంటి రంగాల్లో మేము పెద్దమార్పులు తీసుకొచ్చాం’’ అని కేజ్రీవాల్‌ చెప్పారు.
మరోవైపు, యూపీ ప్రభుత్వం విద్యుత్‌ సరఫరాలో సరైన చర్యలు తీసుకోకపోవడం వల్ల ప్రజలు ఇబ్బందులు పడుతున్నారని ఆరోపించారు. ‘‘మా దిల్లీ మోడల్‌ ద్వారా ఎలా మెరుగైన సేవలు అందించవచ్చో చూపించాం. మీరెప్పుడు ఎలాంటి చర్యలు తీసుకుంటారు?’’ అని కేజ్రీవాల్‌ నిలదీశారు.
దిల్లీ అసెంబ్లీ ఎన్నికలు సమీపిస్తున్న వేళ ఈ రాజకీయ విమర్శలు, ప్రతివిమర్శలు మరింత వేడెక్కిస్తున్నాయి. ఫిబ్రవరి 5న పోలింగ్‌ జరుగనుండగా, ఫలితాలు ఫిబ్రవరి 8న వెలువడతాయి. భాజపా, ఆప్‌ తమ తమ హవాను కొనసాగించేందుకు శక్తివంచన లేకుండా ప్రయత్నిస్తున్నాయి.