మూవీడెస్క్: తమిళ పరిశ్రమలో వరుస బ్లాక్‌బస్టర్ సినిమాలతో తనకంటూ ప్రత్యేకమైన గుర్తింపును తెచ్చుకున్న అట్లీ, ఇటీవల షారుఖ్ ఖాన్‌తో చేసిన “జవాన్” విజయంతో మరో లెవెల్‌కు ఎదిగాడు.
ఈ హిట్ తర్వాత, ఆయన నెక్స్ట్ ప్రాజెక్ట్‌పై అందరిలోనూ ఆసక్తి నెలకొంది.
“జవాన్ 2” చేస్తారా లేదా షారుఖ్‌తో మరో కొత్త కథతో ముందుకు వెళ్లారా అనే చర్చలు జరుగుతున్నప్పటికీ, తాజాగా మరో క్రేజీ వార్త వైరల్ అవుతోంది.
అట్లీ తన నెక్స్ట్ ప్రాజెక్ట్‌ను ఓ భారీ మల్టీస్టారర్‌గా ప్లాన్ చేస్తున్నట్లు టాక్.
కోలీవుడ్ సూపర్ స్టార్ రజినీకాంత్, బాలీవుడ్ కండల వీరుడు సల్మాన్ ఖాన్ లతో కలిపి ఒక భారీ యాక్షన్ ఎంటర్టైనర్ తెరకెక్కించబోతున్నారని సినీ వర్గాలు చెప్పుకుంటున్నాయి.
ఈ ప్రాజెక్ట్ కోసం ప్రాథమిక చర్చలు కూడా జరిగాయని, ఇద్దరు స్టార్ల డేట్స్ అందుబాటులో ఉంటే సినిమా సెట్స్‌పైకి వెళ్లే అవకాశం ఉందని సమాచారం.
ఇప్పటికే రజినీకాంత్ “జైలర్”తో మరో భారీ హిట్ అందించగా, సల్మాన్ ఖాన్ తమిళ డైరెక్టర్ ఏ ఆర్ మురుగదాస్‌తో “సికందర్” చిత్రంలో నటిస్తున్నారు.
ఈ నేపథ్యంలో అట్లీ ప్రాజెక్ట్ వీరిని ఒకే చతురంగంలో కలిపి, పాన్ ఇండియా స్థాయిలో ఒక భారీ హిట్‌ను అందించే దిశగా ప్లాన్ చేస్తున్నట్లు తెలుస్తోంది.
అయితే, ఈ వార్తలపై అధికారిక ప్రకటన లేదు. కానీ అట్లీ గత సినిమాల విజయాల తీరును చూసి, ఈ ప్రాజెక్ట్‌కు సంబంధించిన అంచనాలు భారీగా పెరిగాయి.
“జవాన్”లో ఆయన చూపించిన మాస్ ఎమోషన్, గ్రాండ్ మేకింగ్, ఇద్దరు స్టార్లతో మరింత పెరిగేలా ఉంటుందనడంలో సందేహం లేదు.
మరి ఈ క్రేజీ మల్టీస్టారర్ ఎంతవరకు నిజమవుతుందో వేచి చూడాలి.