అంతర్జాతీయం: ఆదాయపు పన్నుపై ట్రంప్‌ సంచలన ప్రకటనలు
అమెరికా పౌరులకు ఆదాయపు పన్ను రద్దు చేయడం ద్వారా ఆర్థిక వ్యవస్థను పునరుద్ధరించే దిశగా మాజీ అధ్యక్షుడు డొనాల్డ్‌ ట్రంప్‌ కీలక నిర్ణయాలు ప్రకటించారు. సోమవారం రిపబ్లికన్‌ సమావేశంలో ఆయన ఈ ప్రణాళికలపై తన అభిప్రాయాలను వెల్లడించారు.
ప్రజల ఆదాయంపై పన్నులు విధించడం స్థానంలో, ఆర్థిక వ్యవస్థలో నిధుల ప్రవాహాన్ని పెంచడం, ప్రజలను సంపన్నులుగా మారేలా చేయడమే ఈ నిర్ణయానికి ముఖ్య ఉద్దేశం అని ట్రంప్‌ అభిప్రాయపడ్డారు. ప్రస్తుతం ఇన్‌కమ్‌ ట్యాక్స్‌ ద్వారా ప్రభుత్వానికి పెద్దమొత్తంలో ఆదాయం వస్తోంది. దీనిపై కోత విధిస్తే, దిగుమతి సుంకాలను ఉపయోగించి దాన్ని భర్తీ చేయాలని ఆయన పేర్కొన్నారు.
‘‘అమెరికన్లను మరింత ధనవంతులు చేయడం, ఇతర దేశాలకు మన వనరులను మళ్లించకుండా కాపాడటం కీలకం. విదేశాలపై పన్నులు విధించి, ఆ మొత్తాన్ని దేశానికి ఉపయోగపడేలా చేస్తాం. ఇందుకోసం ప్రత్యేక ఎక్స్‌టర్నల్ రెవెన్యూ సర్వీసును ప్రారంభించాను’’ అని ట్రంప్‌ స్పష్టం చేశారు.
1870–1913 మధ్య కాలంలో అమెరికా అత్యధిక సంపద కలిగిన సమయంగా ట్రంప్‌ ప్రస్తావించారు. ఆ కాలంలో దిగుమతి సుంకాల ఆధారంగా ప్రభుత్వం పెద్ద మొత్తంలో ఆదాయం సమకూర్చుకునేదని ఆయన గుర్తు చేశారు. ఆధునిక వాణిజ్య విధానాలను మార్చుకోవాలని, అమెరికా ఉద్యోగులు, కుటుంబాల భద్రతకు ప్రాధాన్యం ఇవ్వాలని ఆయన పిలుపునిచ్చారు.
చైనా, భారత్‌పై పన్నుల తీవ్రత
భారత్‌, చైనా, బ్రెజిల్‌పై అత్యధిక పన్నులు విధిస్తామని ట్రంప్‌ ప్రకటించారు. ‘‘బయట దేశాలు ఏం చేస్తున్నాయో చూడండి. చైనా భారీగా పన్నులు వసూలు చేస్తుంది. ఇక భారత్‌, బ్రెజిల్‌, ఇతర దేశాలు కూడా ఆ పద్ధతినే అనుసరిస్తున్నాయి. మనం అలా జరగనీయకూడదు. అమెరికా ప్రయోజనాలు అన్నింటికంటే ముందుండాలి’’ అని పేర్కొన్నారు. గత డిసెంబర్‌లోనే బ్రిక్స్‌ దేశాలు ప్రత్యేక కరెన్సీ ప్రవేశపెట్టేందుకు ప్రయత్నిస్తే 100 శాతం సుంకం విధిస్తామని ఆయన హెచ్చరించారు. డాలర్‌ వినియోగం తగ్గిస్తే దాని ప్రభావాలు తీవ్రమవుతాయని ట్రంప్‌ అన్నారు.