తెలంగాణ: కేంద్ర ఎన్నికల సంఘం ఆంధ్రప్రదేశ్, తెలంగాణ రాష్ట్రాల్లో ఎమ్మెల్సీ ఎన్నికల షెడ్యూల్‌ను విడుదల చేసింది. ఫిబ్రవరి 3న అధికారిక నోటిఫికేషన్ వెలువడనుంది. ఫిబ్రవరి 27న పోలింగ్ నిర్వహించగా, మార్చి 3న ఓట్ల లెక్కింపు జరగనుంది.
ఈ ఎన్నికల్లో రెండు రాష్ట్రాల్లో మూడు చొప్పున ఎమ్మెల్సీ స్థానాలకు ఎన్నికలు జరుగనున్నాయి. తెలంగాణలో మెదక్ నిజామాబాద్ ఆదిలాబాద్ కరీంనగర్ ఉపాధ్యాయ నియోజకవర్గంతో పాటు, అదే ప్రాంతంలో పట్టభద్రుల నియోజకవర్గానికి ఎన్నికలు జరగనున్నాయి. అదనంగా వరంగల్ ఖమ్మం నల్గొండ ఉపాధ్యాయ నియోజకవర్గం కూడా ఈ పోటీలో ఉండనుంది.
ఏపీలో ఉమ్మడి ఉభయ గోదావరి, కృష్ణా-గుంటూరు పట్టభద్రుల నియోజకవర్గాలకు ఎన్నికలు నిర్వహించనున్నారు. అలాగే శ్రీకాకుళం-విజయనగరం-విశాఖపట్నం ఉపాధ్యాయ నియోజకవర్గానికి కూడా ఎన్నికల షెడ్యూల్ ప్రకటించారు.
ఎన్నికల ప్రక్రియ త్వరలోనే ప్రారంభంకానుండటంతో అన్ని రాజకీయ పార్టీలు తమ అభ్యర్థులను ఖరారు చేసేందుకు సిద్ధమవుతున్నాయి.