ఉస్మానియా ఆసుపత్రి నూతన భవనానికి సీఎం రేవంత్ శంకుస్థాపన

తెలంగాణ: ఉస్మానియా ఆసుపత్రి నూతన భవనానికి సీఎం రేవంత్ శంకుస్థాపన

ప్రజలకు అత్యాధునిక వైద్యసేవలు అందించాలనే లక్ష్యంతో ఉస్మానియా ఆసుపత్రి పునర్నిర్మాణ పనులకు ముఖ్యమంత్రి రేవంత్ రెడ్డి శంకుస్థాపన చేశారు. ఉప ముఖ్యమంత్రి భట్టి విక్రమార్క, వైద్య ఆరోగ్యశాఖ మంత్రి దామోదర్ రాజనర్సింహ, ఇతర మంత్రుల సమక్షంలో భూమిపూజ నిర్వహించారు.

ప్రస్తుతం అఫ్జల్‌గంజ్‌లో ఉన్న ఉస్మానియా ఆసుపత్రి, గోషామహల్‌ స్టేడియం వద్ద కొత్త భవనంగా మారనుంది. 32 లక్షల చదరపు అడుగుల విస్తీర్ణంలో, 2000 పడకల సామర్థ్యంతో నిర్మాణం చేపట్టనున్నారు. ప్రభుత్వ ప్రణాళికల ప్రకారం, ఇది దేశంలోనే అత్యాధునిక వైద్య సదుపాయాలు కలిగిన ఆసుపత్రిగా మారనుంది.

రెండేళ్లలో పూర్తయ్యే భారీ ప్రాజెక్ట్

వైద్య ఆరోగ్యశాఖ మంత్రి దామోదర్ రాజనర్సింహ మాట్లాడుతూ, “30 ఏళ్లుగా ఊరిస్తున్న ఉస్మానియా ఆసుపత్రి పునర్నిర్మాణం ఇప్పుడు నిజం కాబోతోంది” అన్నారు. “నూతన ఆసుపత్రి నిర్మాణానికి సంబంధించిన ప్రక్రియను కేవలం 6 నెలల్లో పూర్తి చేసి సీఎం శంకుస్థాపన చేశారు. వేలాది మంది రోగులకు ఉస్మానియా ఆసుపత్రిపై నమ్మకం ఉంది. అందుకే దీన్ని ఇతర ప్రాంతాలకు తరలించకుండా గోషామహల్‌లోనే నిర్మాణం చేపట్టాం” అని తెలిపారు.

ఆసుపత్రి 5 విడతల్లో నిర్మాణం పూర్తవుతుందని, అన్ని రకాల వైద్య సేవలు ఉచితంగా అందుబాటులోకి తీసుకువస్తామని పేర్కొన్నారు. ప్రాజెక్ట్‌ మొత్తం వ్యయం రూ.2700 కోట్లు ఉంటుందని, రెండు సంవత్సరాల్లోనే భవనం నిర్మాణం పూర్తవుతుందని వెల్లడించారు.

కార్పొరేట్ స్థాయిలో వైద్య సదుపాయాలు

26 ఎకరాల విస్తీర్ణంలో రూపుదిద్దుకుంటున్న ఉస్మానియా ఆసుపత్రి భవనం, కార్పొరేట్‌ స్థాయి సౌకర్యాలతో వెలసనుంది. ఇటీవల జరిగిన సమీక్షలో ముఖ్యమంత్రి రేవంత్ రెడ్డి, “రాబోయే వందేళ్ల వైద్య అవసరాలను తీర్చేలా ఆసుపత్రిని అభివృద్ధి చేయాలి” అని అధికారులను ఆదేశించారు.

ఆసుపత్రిలో సూపర్ స్పెషాలిటీ సేవలు, ప్రత్యేకమైన ఆపరేషన్ థియేటర్లు, ఐసీయూ, పోస్ట్ ఆపరేటివ్ వార్డులు, అన్ని రకాల డయాగ్నొస్టిక్ సదుపాయాలు ఒకేచోట ఏర్పాటు చేయనున్నారు. ఈ ప్రాజెక్ట్ పూర్తయిన తర్వాత ఆసుపత్రిలో వైద్యుల సంఖ్య 20 శాతం పెరగనుంది.

రోజుకు 5000 మంది రోగులకు వైద్య సేవలు

ప్రస్తుతం ఉస్మానియాలో భారీ స్థాయిలో ఓపీ రోగులు వస్తుండగా, కొత్త భవనం ప్రారంభమైన తర్వాత రోజుకు 5000 మంది రోగులకు వైద్య సేవలు అందించేలా ఏర్పాట్లు చేయనున్నారు. 30 వైద్య విభాగాలతో రోబోటిక్ సర్జరీలు నిర్వహించే అత్యాధునిక సదుపాయాలను అందుబాటులోకి తీసుకురాబోతున్నారు.