అమరావతి: తెలుగు రాష్ట్రాలకు మరిన్ని వందే భారత్ రైళ్లు: కేంద్ర రైల్వే మంత్రి అశ్విని వైష్ణవ్
తెలుగు రాష్ట్రాలకు మరిన్ని వందే భారత్ రైళ్లు అందుబాటులోకి తీసుకురానున్నట్లు కేంద్ర రైల్వే శాఖ మంత్రి అశ్విని వైష్ణవ్ తెలిపారు. రైల్వే ప్రాజెక్టుల విషయంలో తెలంగాణకు అన్యాయం జరగలేదని స్పష్టం చేశారు. కాజీపేట రైల్వే స్టేషన్‌ను అభివృద్ధి చేస్తున్నామని, కొన్ని పనులకు అనుమతులు రావాల్సి ఉండటంతో ఆలస్యం జరుగుతోందని వివరించారు. సోమవారం ఢిల్లీలో మీడియాతో మాట్లాడిన ఆయన, రైల్వే అభివృద్ధిపై పలు అంశాలను వివరించారు.
వందే భారత్ రైళ్లలో స్లీపింగ్‌ సీట్ల పై ప్రయోగాలు
ఇటీవల స్విట్జర్లాండ్‌ వెళ్లి అక్కడి రైల్వే వ్యవస్థను పరిశీలించినట్లు అశ్విని వైష్ణవ్ తెలిపారు. స్విట్జర్లాండ్‌ మాదిరిగా రైల్వే ట్రాక్‌ల నిర్వహణను మెరుగుపరిచే ప్రయత్నాలు చేస్తున్నామని చెప్పారు. వందే భారత్ రైళ్లలో స్లీపింగ్‌ సీట్లను అందుబాటులోకి తేవడానికి ప్రయోగాలు నిర్వహిస్తున్నట్లు వెల్లడించారు. ముఖ్యమైన రైల్వే స్టేషన్ల పరిధిలో రక్షణ కోసం ‘కవచ్‌’ టెక్నాలజీ అమలు చేస్తున్నామని, ఇప్పటికే తెలంగాణలో 1,326 కి.మీ మేర ఈ టెక్నాలజీ అమలులో ఉందని తెలిపారు. అదనంగా 1,026 కి.మీ మేరలో ‘కవచ్‌’ అమలు చేయనున్నామని, 2026 నాటికి దేశమంతా ఈ టెక్నాలజీ అందుబాటులోకి వస్తుందని వివరించారు.
తెలంగాణకు ఐదు వందే భారత్ రైళ్లు
ప్రస్తుతం తెలంగాణ నుంచి ఐదు వందే భారత్ రైళ్లు నడుస్తున్నాయని అశ్విని వైష్ణవ్ తెలిపారు. రాష్ట్రంలోని అన్ని రైల్వే లైన్ల విద్యుదీకరణ పూర్తయిందని, పేద వర్గాల ప్రయాణ సౌకర్యాన్ని మెరుగుపరిచేందుకు ‘నమో భారత్’ రైళ్లు అందుబాటులోకి తీసుకువస్తున్నామని తెలిపారు. త్వరలో దేశవ్యాప్తంగా 100 ‘నమో భారత్’ ఎక్స్‌ప్రెస్‌లు ప్రారంభించనున్నట్లు వెల్లడించారు.
ఏపీలో రైల్వే ప్రాజెక్టులకు రూ. 9,417 కోట్లు కేటాయింపు
ఆంధ్రప్రదేశ్‌లో రైల్వే అభివృద్ధికి రూ. 9,417 కోట్లు కేటాయించినట్లు అశ్విని వైష్ణవ్ తెలిపారు. యూపీఏ ప్రభుత్వ హయాంలో కంటే 11 రెట్లు అధికంగా నిధులు కేటాయించామని వివరించారు. ప్రస్తుతం రాష్ట్రంలో రూ. 84,559 కోట్లతో వివిధ రైల్వే ప్రాజెక్టులు అమలవుతున్నాయని తెలిపారు. కొత్తగా 1,560 కిలోమీటర్ల రైల్వే లైన్‌ నిర్మాణం పూర్తయిందని, రైల్వే పనులు వేగంగా సాగేలా సీఎం సహకరిస్తున్నారని అన్నారు.
ఏపీలో 16 జిల్లాల మీదుగా 8 వందే భారత్ రైళ్లు
ప్రస్తుతం ఆంధ్రప్రదేశ్‌లోని 16 జిల్లాల మీదుగా 8 వందే భారత్ రైళ్లు నడుస్తున్నాయని, రాబోయే రోజుల్లో మరిన్ని వందే భారత్ రైళ్లు కేటాయిస్తామని అశ్విని వైష్ణవ్ వెల్లడించారు. రైల్వే లైన్ల వేగాన్ని పెంచే దిశగా చర్యలు చేపడుతున్నామని, కొన్నిచోట్ల ట్రైన్‌ వేగాన్ని 110 కి.మీ నుంచి 160 కి.మీ వరకు పెంచే పనులు జరుగుతున్నాయని వివరించారు. ఏపీలో ఇప్పటికే అనేక రైల్వే ప్రాజెక్టులు కొనసాగుతున్నందున వాటిని బడ్జెట్‌లో ప్రత్యేకంగా ప్రస్తావించలేదని తెలిపారు.