తెలంగాణ: తెలంగాణ రైల్వే ప్రాజెక్టులకు భారీ కేటాయింపు
తెలంగాణ రైల్వే ప్రాజెక్టులకు కేంద్ర బడ్జెట్‌ 2025-26లో రూ.5,337 కోట్లు కేటాయించినట్లు కేంద్ర రైల్వేశాఖ మంత్రి అశ్వినీ వైష్ణవ్ వెల్లడించారు. 2009-14 మధ్య ఉమ్మడి ఆంధ్రప్రదేశ్‌కి యూపీయే హయాంలో సగటున రూ.886 కోట్లు మాత్రమే కేటాయించగా, ప్రస్తుతం ఆ మొత్తానికి ఆరెట్లు అధికంగా నిధులు అందుతున్నాయని మంత్రి తెలిపారు.
దిల్లీలోని రైల్వే శాఖ ప్రధాన కార్యాలయంలో సోమవారం నిర్వహించిన విలేకర్ల సమావేశంలో మంత్రి వైష్ణవ్ మాట్లాడుతూ, గత పది సంవత్సరాల్లో తెలంగాణలో 753 కిలోమీటర్ల కొత్త రైల్వే ట్రాక్ నిర్మించామని వెల్లడించారు. ఇది యునైటెడ్ అరబ్ ఎమిరేట్స్ (UAE) మొత్తం రైల్వే నెట్‌వర్క్‌తో దాదాపు సమానమని చెప్పారు.
100% రైల్వే విద్యుదీకరణ – భారీ ప్రాజెక్టుల అమలు
తెలంగాణలో 100% రైల్వే విద్యుదీకరణ పూర్తయిందని మంత్రి వెల్లడించారు. ఇప్పటివరకు 453 ఫ్లైఓవర్లు, అండర్‌బ్రిడ్జిలు నిర్మించామని, 62 లిఫ్ట్‌లు, 17 ఎస్కలేటర్లు, 48 ప్రధాన స్టేషన్లలో ఫ్రీ వైఫై సౌకర్యం కల్పించామని తెలిపారు.
ప్రస్తుతం రాష్ట్రంలో రూ.39,300 కోట్లతో 2,529 కిలోమీటర్ల మేర 22 కొత్త ట్రాక్‌ల నిర్మాణ పనులు జరుగుతున్నాయి. అలాగే రూ.1,992 కోట్లతో 40 అమృత్‌ స్టేషన్లను అభివృద్ధి చేస్తున్నామని వివరించారు.
హైదరాబాద్, సికింద్రాబాద్ స్టేషన్ల అభివృద్ధికి భారీ నిధులు
రాష్ట్రంలో ప్రస్తుత ప్రధాన ప్రాజెక్టులలో సికింద్రాబాద్ రైల్వే స్టేషన్ అభివృద్ధికి రూ.715 కోట్లు, హైదరాబాద్ రైల్వే స్టేషన్ అభివృద్ధికి రూ.327 కోట్లు కేటాయించారని మంత్రి తెలిపారు. ఈ పనులు వేగంగా కొనసాగుతున్నాయని వెల్లడించారు.
ప్రస్తుతం తెలంగాణలో ఏడు జిల్లాల మీదుగా ఐదు వందే భారత్ రైళ్లు నడుస్తున్నాయని తెలిపారు. భవిష్యత్తులో మరిన్ని హై-స్పీడ్ రైళ్లు అందుబాటులోకి తేవాలని లక్ష్యంగా పెట్టుకున్నామని మంత్రి పేర్కొన్నారు.
కవచ్ భద్రతా వ్యవస్థ విస్తరణ – 1,326 కి.మీ. టార్గెట్
రైల్వే భద్రతను మెరుగుపరిచేందుకు “కవచ్” టెక్నాలజీని 1,326 కిలోమీటర్ల రైల్వే మార్గంలో అమలు చేయనున్నట్లు అశ్వినీ వైష్ణవ్ ప్రకటించారు. ప్రస్తుతం 1,011 కిలోమీటర్ల మేర పనులు పురోగతిలో ఉన్నాయని, 2024 నుంచి వచ్చే ఆరేళ్లలో దేశవ్యాప్తంగా రైల్వే నెట్‌వర్క్ మొత్తం కవచ్‌తో రక్షణ కల్పించేందుకు ప్రణాళికలు సిద్ధం చేస్తున్నట్లు వివరించారు.
కాజీపేట రైల్వే యూనిట్‌కు కొత్త ఒరవడి
కాజీపేట రైల్వే యూనిట్‌ను “మల్టిపుల్ మాన్యుఫాక్చరింగ్ యూనిట్”గా అభివృద్ధి చేయనున్నట్లు మంత్రి వెల్లడించారు. త్వరలోనే అక్కడ ఉత్పత్తి ప్రక్రియ ప్రారంభమవుతుందని, దీనివల్ల పెద్ద సంఖ్యలో స్థానికులకు ఉపాధి అవకాశాలు లభిస్తాయని ఆయన పేర్కొన్నారు.
ప్రాజెక్టుల ఆమోదానికి శాస్త్రీయ విధానం – కేంద్రం స్పష్టీకరణ
గత యూపీయే ప్రభుత్వ హయాంలో కొన్ని ప్రాజెక్టులను నామమాత్రంగా బడ్జెట్‌లో చేర్చి, తక్కువ కేటాయింపులు చేసేవారని అశ్వినీ వైష్ణవ్ ఆరోపించారు. ప్రస్తుతం కేంద్ర ప్రభుత్వం శాస్త్రీయ పద్ధతిలో ప్రాజెక్టులను ఆమోదిస్తోందని, మొదట సర్వే నిర్వహించి, ఫీజిబిలిటీ స్టడీ, డీపీఆర్ సిద్ధం చేసిన తర్వాతే ఆర్థికశాఖ, నీతి ఆయోగ్, వాణిజ్యశాఖ అనుమతులతో కేబినెట్ ముందు ప్రవేశపెడతామని ఆయన తెలిపారు.
మొత్తం రూ.40 వేల కోట్ల కొత్త ప్రాజెక్టులకు ఆమోదం
దేశవ్యాప్తంగా గత జులై నుంచి ఇప్పటివరకు రూ.40,000 కోట్ల విలువైన కొత్త రైల్వే ప్రాజెక్టులకు కేంద్రం అనుమతినిచ్చిందని మంత్రి వెల్లడించారు. ప్రతిసారీ బడ్జెట్‌లో కొత్త ప్రాజెక్టులను ప్రకటించకుండా, సంవత్సరమంతా అవసరమైన ప్రాజెక్టులను ఆమోదించే విధానాన్ని అమలు చేస్తున్నామని ఆయన వివరించారు.
రైల్వే ట్రాక్ మెయింటెనెన్స్ – మార్పులు తప్పవు
కొన్ని రైల్ స్టాప్‌లను మార్చడం అనివార్యమైందని, ట్రాక్ మెయింటెనెన్స్ నిర్వహించేందుకు కనీసం మూడు గంటల సమయం ఖాళీగా ఉండాల్సిన అవసరం ఉందని మంత్రి స్పష్టం చేశారు. భద్రత పరంగా మెయింటెనెన్స్ చాలా కీలకమని, దీని ద్వారా ప్రమాదాలను తగ్గించవచ్చని వివరించారు.