హైదరాబాద్: ఇందిరమ్మ ఇండ్లు – ఎల్-1, ఎల్-2, ఎల్-3 కేటగిరీల అర్థం ఏమిటి?
పథకానికి భారీ స్పందన
తెలంగాణలో అధికార కాంగ్రెస్ ప్రభుత్వం ఇందిరమ్మ ఇండ్ల పథకాన్ని ప్రతిష్టాత్మకంగా అమలు చేస్తోంది. తొలిదశలో 4.50 లక్షల ఇండ్ల నిర్మాణానికి అనుమతి ఇచ్చిన ప్రభుత్వం, ప్రతి నియోజకవర్గానికి 3,500 ఇళ్లు కేటాయించింది. జనవరి 26న గణతంత్ర దినోత్సవం సందర్భంగా పథకాన్ని ప్రారంభించిన ప్రభుత్వం, మొదటి విడతలో 71,482 మంది లబ్ధిదారులకు మంజూరు పత్రాలు అందజేసింది.
దరఖాస్తుదారుల ఎంపిక ప్రక్రియ
ఇందిరమ్మ ఇండ్ల లబ్ధిదారుల ఎంపిక కొనసాగుతోంది. ఎంపికైన లబ్ధిదారుల ఇళ్ల నిర్మాణ పనులు ప్రారంభించేందుకు అధికారులు ఏర్పాట్లు చేస్తున్నారు. అయితే, ఇంటి మంజూరుకు అర్హత కలిగి ఉన్నారా? లేదా? అనే అంశాన్ని దరఖాస్తుదారులు సులభంగా తెలుసుకునేలా వెబ్‌సైట్ ద్వారా సేవలు అందుబాటులో ఉన్నాయి.
అప్లికేషన్ స్టేటస్ ఆన్‌లైన్‌లో చెక్ చేయండి
దరఖాస్తుదారులు తమ అప్లికేషన్ స్థితిని indirammaindlu.telangana.gov.in వెబ్‌సైట్ ద్వారా ట్రాక్ చేయవచ్చు. ఆధార్ నెంబర్, మొబైల్ నెంబర్, రేషన్ కార్డు నెంబర్ లేదా అప్లికేషన్ నెంబర్ ఉపయోగించి స్టేటస్ తెలుసుకోవచ్చు. ఇంటి మంజూరు ప్రాసెస్‌లో ఏ దశలో ఉన్నారో చూసేందుకు ఈ వెబ్‌సైట్ ద్వారా అవకాశం ఉంది.
ఎల్-1, ఎల్-2, ఎల్-3 కేటగిరీలు ఏవీ?
ఇందిరమ్మ ఇండ్ల కోసం వచ్చిన దరఖాస్తులను ప్రభుత్వం మూడు ప్రధాన కేటగిరీలుగా విభజించింది:
- ఎల్-1 (L-1): సొంత స్థలం ఉన్న, కానీ ఇల్లు లేని వారిని ఈ జాబితాలో చేర్చారు.
- ఎల్-2 (L-2): సొంత స్థలం లేకుండా ఇల్లు లేని వారిని ఈ కేటగిరీలో ఉంచారు.
- ఎల్-3 (L-3): ఇప్పటికే ఇల్లు ఉన్నప్పటికీ, ఇందిరమ్మ ఇండ్ల కోసం దరఖాస్తు చేసిన వారిని ఈ జాబితాలో చేర్చారు.
లబ్ధిదారుల ప్రాధాన్యత
ప్రభుత్వం ప్రథమంగా ఎల్-1 కేటగిరీలో ఉన్న వారికి ఇళ్లను మంజూరు చేస్తుంది. అప్లికేషన్ స్టేటస్ చెక్ చేసినప్పుడు, ఏ కేటగిరీలో ఉన్నారనే వివరాలతో పాటు, జాబితాలో ఎందుకు చేర్చారన్న రిమార్క్స్ కూడా కనిపిస్తాయి.
అభ్యంతరాల పరిష్కారం
దరఖాస్తుదారులకు తమ స్టేటస్‌పై అభ్యంతరాలు ఉంటే, వెబ్‌సైట్‌లోనే గ్రీవెన్స్ ఆప్షన్ ద్వారా ఫిర్యాదు చేసే అవకాశం కల్పించారు. అధికార కార్యాలయాలకు వెళ్లకుండానే మొబైల్ ఫోన్ ద్వారానే స్టేటస్ తెలుసుకునేలా ప్రభుత్వం అన్ని ఏర్పాట్లు చేసింది.