హైదరాబాద్: అధికారులకు ఈటల తీవ్ర హెచ్చరిక జారీచేశారు!
చట్ట విరుద్ధంగా నడిచే అధికారులకు లెక్క సరిచేస్తాం
ఎమ్మెల్సీ ఎన్నికల ప్రచారంలో భాగంగా బీజేపీ ఎంపీ ఈటల రాజేందర్ ప్రభుత్వ అధికారులకు హెచ్చరిక జారీ చేశారు. ఐఏఎస్, ఐపీఎస్ అధికారులు ప్రజలకు సేవ చేయడమే తమ విధిగా గుర్తు చేసుకుంటూ, ప్రభుత్వ పెద్దల ఆదేశాల ప్రకారం కాకుండా చట్టానుసారం నడుచుకోవాలని సూచించారు.
చట్ట విరుద్ధ చర్యలపై సీరియస్ వార్నింగ్
అధికారులు నిబంధనలకు విరుద్ధంగా వ్యవహరిస్తే దానికి తగిన పరిణామాలు ఎదుర్కొవాల్సి వస్తుందని ఈటల స్పష్టం చేశారు. అవినీతికి పాల్పడిన మాజీ ఐఏఎస్ అధికారి శ్రీలక్ష్మికి పట్టిన గతే, నిబంధనలు ఉల్లంఘించే అధికారులకు ఎదురవుతుందని ఆయన హెచ్చరించారు.
ఆరెంజ్ బుక్..
తాము కూడా అధికారుల వ్యవహారాలను గమనిస్తూ, “ఆరెంజ్ బుక్” నిర్వహిస్తున్నామని ఈటల తెలిపారు. రూల్స్ కు విరుద్ధంగా, ప్రతిపక్ష నాయకులను టార్గెట్ చేసే అధికారుల పేర్లను అందులో నమోదు చేస్తున్నామని వెల్లడించారు. సరైన సమయం వచ్చినపుడు ఆ వివరాలను బహిర్గతం చేసి, వారిపై చట్టపరంగా చర్యలు తీసుకుంటామని పేర్కొన్నారు.
ప్రచారంలో బీజేపీకి ప్రజల మద్దతు
ఎమ్మెల్సీ ఉపాధ్యాయ ఎన్నికల ప్రచారంలో భాగంగా ఈటల మాట్లాడుతూ, రాష్ట్రవ్యాప్తంగా ప్రజలు బీజేపీకి మద్దతు తెలిపుతున్నారని అన్నారు. బీఆర్ఎస్ పాలన విద్యావ్యవస్థను దెబ్బతీసిందని, కాంగ్రెస్ కూడా అదే దారిలో నడుస్తోందని ఆరోపించారు. చివరికి బీఆర్ఎస్‌కు ఎదురైన పరిస్థితి కాంగ్రెస్‌ను కూడా ఎదుర్కోవాల్సి వస్తుందని హెచ్చరించారు.
అధికారులపై నిఘా, బీజేపీ వ్యూహం
బాస్‌ల ఆదేశాలకు అనుగుణంగా కాకుండా, ప్రజలకు న్యాయం జరిగేలా పనిచేయాలని అధికారులకు ఈటల హితవు పలికారు. చట్టాన్ని తప్పించుకునే ప్రయత్నం చేసే వారిని ఉపేక్షించమని స్పష్టం చేశారు. ప్రభుత్వ భవిష్యత్తుపై ప్రజల తీర్పే నిర్ణయాత్మకమవుతుందని పేర్కొన్నారు.