హైదరాబాద్: ఎస్ఎల్‌బీసీ టన్నెల్ ప్రమాదం సమయంలో దుబాయ్‌లో పార్టీ చేసుకున్నారనే విమర్శలకు బీఆర్ఎస్ నేత హరీష్ రావు కౌంటర్ ఇచ్చారు. సహచర ఎమ్మెల్యే కుటుంబ వేడుకకు వెళ్లడం తప్పేనా అని ప్రశ్నించారు. అసలు ప్రభుత్వం స్పందించాల్సిన ఘటనలపై ప్రతిపక్ష నేతలే మాట్లాడాల్సిన పరిస్థితి రావడం దురదృష్టకరమని మండిపడ్డారు.
తాను దుబాయ్‌కి వెళ్లిన తర్వాతే ప్రమాదం జరిగినట్లు స్పష్టంగా ఉందని, ఆ తర్వాత రాష్ట్రానికి తిరిగి వచ్చి స్పందించానని చెప్పారు. ప్రభుత్వ వైఫల్యాన్ని కప్పిపుచ్చుకోవడానికే తనపై బురదజల్లే ప్రయత్నం చేస్తున్నారని అన్నారు.
ప్రమాదం ప్రభుత్వ నిర్లక్ష్యమేనని, బీఆర్ఎస్ హయాంలో పనులు జరగలేదని నిరూపిస్తే తన ఎమ్మెల్యే పదవికి రాజీనామా చేస్తానని సవాల్ విసిరారు. అదే రేవంత్ రెడ్డి నిరూపించలేకపోతే, ఆయన ముఖ్యమంత్రి పదవికి రాజీనామా చేయాలంటూ డిమాండ్ చేశారు.
ప్రభుత్వం తప్పిదాన్ని అంగీకరించి బాధిత కుటుంబాలకు న్యాయం చేయాలని హరీష్ రావు డిమాండ్ చేశారు. నిజానిజాలు బయటపెట్టకుండా ప్రతిపక్ష నేతలపై బురదజల్లడం సరైంది కాదని విమర్శించారు.
ఈ ఘటనపై కాంగ్రెస్, బీఆర్ఎస్ మధ్య మాటల యుద్ధం మరింత ముదురుతోంది. హరీష్ రావు సవాల్‌కు రేవంత్ రెడ్డి ఎలా స్పందిస్తాడో వేచి చూడాలి.