ఏపీ: వైసీపీ ఎమ్మెల్సీ దువ్వాడ శ్రీనివాసరావు అరెస్ట్ అంశంపై రాష్ట్ర రాజకీయాల్లో ఆసక్తికర చర్చ జరుగుతోంది. పోలీసులు ఏ క్షణంలో అయినా ఆయన్ను అరెస్ట్ చేయొచ్చన్న వార్తలు చక్కర్లు కొడుతున్నాయి. ప్రభుత్వ పక్షాన నుంచి గ్రీన్ సిగ్నల్ వస్తే, దువ్వాడను అదుపులోకి తీసుకునే అవకాశం ఉందని విశ్వసనీయ వర్గాలు చెబుతున్నాయి.
ఇప్పటికే దువ్వాడపై పశ్చిమ గోదావరి, ప్రకాశం, గుంటూరు జిల్లాల్లో కేసులు నమోదయ్యాయి. ఎన్నికల సమయంలో జనసేన అధినేత పవన్ కల్యాణ్‌పై అనుచిత వ్యాఖ్యలు చేశారన్న కారణంగా, జనసేన నేతలు ఆయనపై పలుచోట్ల ఫిర్యాదులు చేశారు. భీమవరంలో ఓ జనసేన నాయకుడు తాజాగా మరో కేసు నమోదు చేయడంతో, ఆయన అరెస్ట్‌కు మరింత ఊహగానాలు ఊతమిచ్చాయి.
దువ్వాడపై ఉన్న కేసులను నిశితంగా పరిశీలిస్తున్న ప్రభుత్వం, తగిన సమయంలో చర్యలు తీసుకునే అవకాశం ఉందని సమాచారం. గతంలో వైసీపీ అధికారంలో ఉండగా విపక్షాలపై విమర్శలు చేసిన నేతల్లో దువ్వాడ శ్రీను ప్రముఖుడు. ఇప్పుడు కొత్త ప్రభుత్వం ఏర్పాటైన నేపథ్యంలో, ఆయనపై కేసులు తీవ్రంగా మారాయి.
ఇటీవల పోసాని కృష్ణమురళి కూడా విమర్శల కేసులో అరెస్ట్ అయ్యారు. అదే విధంగా, దువ్వాడ శ్రీనివాసరావుపై మరో రెండు జిల్లాల్లో కేసులు నమోదయ్యే అవకాశమున్నట్లు తెలుస్తోంది.
దువ్వాడ శ్రీనివాసరావుపై ఎప్పుడు అరెస్ట్ జరుగుతుందన్నదానిపై ఉత్కంఠ నెలకొంది. ఈ కేసు మరింత ముదిరితే, ఆయన రాజకీయ భవిష్యత్తుపై కూడా ప్రభావం పడే అవకాశముందని రాజకీయ పరిశీలకులు భావిస్తున్నారు.