ఆంధ్రప్రదేశ్: రాజకీయాల్లో వైఎస్ జగన్ మోహన్ రెడ్డి తన రాజకీయ వ్యూహాన్ని మారుస్తున్నట్లు సంకేతాలు కనిపిస్తున్నాయి. 2019లో ఘన విజయం సాధించిన వైసీపీ, 2024లో కేవలం 11 సీట్లకు పరిమితమవడంతో, జగన్ తన రాజకీయం మళ్లీ పునఃసంస్థాపించుకోవాల్సిన అవసరం ఏర్పడింది.
దీనికి పరిష్కారంగా ప్రజా దర్బార్‌ను ప్రారంభించబోతున్నారని సమాచారం. ప్రజల సమస్యలను నేరుగా స్వీకరించి, వారి మధ్య తిరిగి ప్రజాదరణ పొందేందుకు ఆయన ఈ కొత్త వ్యూహాన్ని సిద్ధం చేసుకుంటున్నట్లు చెబుతున్నారు.
జగన్ తీసుకుంటున్న ఈ మార్గం, గత ఎన్నికల ముందు నారా లోకేశ్ అనుసరించిన విధానాన్ని పోలివుందని రాజకీయ విశ్లేషకులు అభిప్రాయపడుతున్నారు. లోకేశ్ నిరంతరం ప్రజల మధ్య ఉండటమే, 2024లో టీడీపీ ఘన విజయానికి ఒక కారణంగా చెప్పుకోవచ్చు.
అదే మాదిరిగా, జగన్ కూడా ప్రజల సమస్యలను స్వయంగా వినేందుకు ముందుకు రాబోతున్నారా? అన్నది ఆసక్తిగా మారింది.
తాజాగా వైసీపీ కార్యాలయం వద్ద ప్రత్యేక ఏర్పాట్లు జరుగుతుండటం, క్యూ లైన్లు, భద్రతా మార్గదర్శకాలు సిద్ధమవుతుండటం చూస్తుంటే, ప్రజలతో ప్రత్యక్షంగా కలవడానికి జగన్ సన్నద్ధమవుతున్నట్లు తెలుస్తోంది.
అధికారంలో ఉన్న సమయంలో ప్రజలకు దూరంగా ఉన్న జగన్, ఇప్పుడు ప్రత్యక్షంగా ఫిర్యాదులను స్వీకరించేందుకు సిద్ధమవుతున్నారా అన్న చర్చ ప్రారంభమైంది.
ఇది కేవలం ఒక రాజకీయ వ్యూహమేనా, లేక నిజంగా ప్రజలతో మమేకమై కొత్త దారిని ఎంచుకోవాలనుకుంటున్నారా? అనే ప్రశ్నకు సమాధానం త్వరలోనే రానుంది.
కానీ జగన్ తిరిగి ప్రజల మద్దతును పొందాలంటే, ఇది సరైన మార్గమేనని పార్టీ వర్గాలు చెబుతున్నాయి. ఇక ఆయన ప్రజా దర్బార్ వాస్తవంగా ఎటువంటి ప్రభావాన్ని చూపుతుందో వేచి చూడాలి.