న్యూఢిల్లీ: ఫేస్ బుక్ వారి సోషల్ మెసేజింగ్‌ యాప్‌ అయిన వాట్సాప్ తమ వినియోగదారుల కోసం మరో కొత్త ఫీచర్‌ను లాంచ్‌ చేయనుంది. పలు గ్రూపులు, వ్యక్తుల నుంచి ఇబ్బడి ముబ్బడిగా వచ్చి పడుతున్న మెసేజ్‌లను, ఫోటోలను, వీడియోలు తదితర కంటెంట్‌ను డిలీట్ చేయడానికి చాలా ఇబ్బందులు పడేవాళ్ళు, తాజాగా ఇలాంటి జంక్ మెసేజెస్‌ను సులువుగా తొలగించేందుకు వీలుగా ఒక కొత్త ఫీచర్‌ను పరిచయం చేసింది.
వాట్సాప్ వినియోగదారులకు ఎంతో ఉపయోగపడే విధంగా స్టోరేజ్ మేనేజ్‌మెంట్ ఫీచర్‌ను అందుబాటులోకి తీసుకురానున్నట్లు అధికారికంగా ప్రకటించింది. తద్వారా పలుసార్లు ఫార్వార్డ్ చేసిన, అనవసరమైన వీడియోలను, ఫొటోలను క్లీన్ చేసుకునేందుకు మరింత సులభం కానుంది. 5ఎంబీ కంటే ఎక్కువ సైజులో ఉన్న ఫైలును ఈ ఫీచర్ గుర్తిస్తుంది.
పరిమాణంలో ఫైల్ సైజ్‌ను బట్టి విడివిడిగా చూపిస్తుందని, దాని ద్వారా అవసరమైన వాటిని, అనవసరమైన వాటిని వినియోగదారులు త్వరగా గుర్తించగలుగుతారని సంస్థ పేర్కొంది. అంతేకాకుండా ఒకటి లేదా చాలా వాటిని డిలీట్ చేయడానికి ముందు ఒకసారి చూసుకునే వెసులుబాటును కల్పిస్తుందని అన్నారు. అయితే ఈ ఫీచర్ ప్రపంచ వ్యాప్తంగా ఈ వారంలో విడుదల చేయనున్నట్లు తెలిపారు.