న్యూఢిల్లీ: యూఎస్ కాలిఫోర్నియాకు చెందిన కార్ల కంపెనీ అప్టెరా ఎలక్ట్రిక్‌ కంపెనీ సరికొత్త సోలార్ సాంకేతిక పరిజ్ఞానంతో భవిష్యత్తు అవసరాలకు తగిన విధంగా ఉండేలా అద్భుతమైన ఓ కార్ల మోడల్‌ను మార్కెట్లోకి తేనుంది. గంటకు 110 మైళ్ల వేగంతో దూసుకెళ్లే ఈ కార్లను ఎప్పుడూ 24 గంటల లోపల చార్జింగ్‌ చేయవలసిన అవసరమే ఉండదంటోంది ఈ కంపెనీ.
ఈ కొత్త కారుకు అమర్చిన సోలార్ పానెళ్లతోనే చార్జవుతూ కారు ముందుకు వెళ్తుంది. మరి రాత్రి పూట ప్రయాణాల్లో సూర్య కిరణాలు తగలవు కనుక వెయ్యి మైళ్ల వరకు సునాయాసంగా తీసుకెళ్లే బ్యాటరీని ఈ కారుకు అమర్చారు. ఈ బ్యాటరీని కూడా ప్రత్యేకంగా చార్జింగ్‌ చేయాల్సిన అవసరం ఉండదు. సోలార్ ప్యానెళ్ల సహకారంతో కారు నడుస్తున్నప్పుడే ఈ బ్యాటరీ చార్జీ అవుతుంది.
సోలార్ కార్ల రంగంలో ప్రపంచ ప్రసిద్ధి చెందిన టెల్సా కంపెనీ మోడల్‌ కార్ల స్పేర్‌ బ్యాటరీతో 370 మైళ్లు మాత్రమే నడిచే అవకాశం ఉండగా, అప్టెరా కంపెనీ మోడల్‌ సరికొత్త సోలార్ కారు వెయ్యి మైళ్ల వరకు బ్యాటరీ సహాయంతో దూసుకెళుతుందని కంపెనీ వర్గాలు ప్రకటించాయి. వెయ్యి మైళ్లు ఇచ్చే సోలార్ బ్యాటరీ చార్జింగ్‌ పూర్తిగా అయిపోతే లేదా ఐదారు రోజుల వరకు కారును బయటకు తీయకపోతే బ్యాటరీని చార్జి చేసుకోవాల్సిన అవసరం ఉంటుందట.
ఇక ప్రతి రోజు ఈ కారును నడిపే వారికి దాన్ని ఎన్నడూ ప్రత్యేకంగా బ్యాటరీని చార్జి చేసుకోవాల్సిన అవసరం రాదని కంపెనీ వర్గాలు తెలుపుతున్నాయి. ఈ కారు ఖరీదు 26 వేల డాలర్లు (దాదాపు 19 లక్షల రూపాయలు). ఇందులో ఖరీదైన మోడళ్లు 47 వేల డాలర్ల (దాదాపు 35 లక్షల రూపాయలు) వరకు ఉన్నాయి అని తెలిపింది. ఈ కార్లు మూడున్నర క్షణాల్లోనే జీరో వేగం నుంచి గంటకు 60 కిలోమీటర్ల వేగాన్ని పుంజుకుంటుందట.