వాషింగ్టన్‌: కోవిడ్ వ్యాక్సిన్ సిద్ధం అయ్యాక బహిరంగంగా తీసుకుంటానని ప్రకటించిన అమెరికా నూతన అధ్యక్షుడిగా ఎన్నికైన జో బైడెన్‌ మాట నిలబెట్టుకున్నారు. ప్రజల మధ్యలో కరోనావైరస్‌ వ్యాక్సిన్ తీసుకుంటాను అన్న బైడెన్‌ దాన్ని నిజం చేసి చూపించారు. బైడెన్‌ సోమవారం క్రిస్టియానాకేర్ ఆస్పత్రిలో ప్రజల సమక్షంలో ఫైజర్‌ బయోఎన్‌టెక్‌ కోవిడ్ వ్యాక్సిన్ ఫస్ట్‌ డోస్‌ తీసుకున్నారు.
ఈ నేపథ్యంలో ఆయన మాట్లాడుతూ, ‘వ్యాక్సిన్ అందుబాటులోకి వచ్చినప్పుడు ప్రజలు ఎలాంటి అనుమానాలకు తావు లేకుండా దాన్ని తీసుకోవాలనే ఉద్దేశంతోనే నేను ఇలా ప్రజల సమక్షంలో వ్యాక్సిన్ తీసుకున్నాను’ అన్నారు. క్రిస్టియానాకేర్ ఆసుపత్రిలో నర్సు ప్రాక్టీషనర్, ఎంప్లాయీ హెల్త్ సర్వీసెస్ హెడ్ తబే మాసా బైడెన్‌కి వ్యాక్సిన్ వేశారు.
నూతన అధ్యక్షుడి భార్య డాక్టర్ జిల్ బిడెన్ ఇప్పటికే వ్యాక్సిన్ మొదటి కోర్సును తీసుకున్నారు. బైడెన్‌ వ్యాక్సిన్ తీసుకోవడానికి వెళ్లగా ఆమె కూడా హాజరయ్యారు. ఈ నేపథ్యంలో బైడెన్‌ “ఈ రోజు నేను కోవిడ్-19 వ్యాక్సిన్ తీసుకున్నాను. ఈ వ్యాక్సిన్‌ని అందుబాటులోకి తీసుకువచ్చేందుకు అవిశ్రాంతంగా కృషి చేసిన శాస్త్రవేత్తలు, వైద్యులకు ధన్యవాదాలు తెలుపుతున్నాను అని ఆయన తెలిపారు.
మేము ఈ విషయంలో మీకు చాలా రుణపడి ఉన్నాము. అమెరికా ప్రజలు ఒక విషయం తెలుసుకోవాలి, దీనిలో భయపడాల్సిన విషయం ఏం లేదు. ఇక జనాలందరికి సరిపడా వ్యాక్సిన్ అందుబాటులోకి వచ్చిన నాడు మీరు దాన్ని తీసుకోవడానకి సిద్ధంగా ఉండండి” అని ట్విట్టర్‌ వేదికగా జనాలను కోరారు.