కోలీవుడ్: తమిళ నాడు మాజీ ముఖ్య మంత్రి జయ లలిత గారి గురించి ప్రత్యేకంగా చెప్పుకోవాల్సింది ఏమీ లేదు. ఒక మామూలు కుటుంబం నుండి వచ్చి సినిమాల్లో నటిస్తూ ఆ తర్వాత రాజకీయాల్లోకి అడుగుపెట్టి ఒక రాష్ట్ర ముఖ్య మంత్రిగా పలు మార్లు ఎన్నికై ఎనలేని సేవలు అందించారు. అలాంటి వ్యక్తి జీవిత కథ ఆధారంగా ఇపుడు పలు సినిమాలు రూపొందుతున్నాయి. అందులో ముఖ్యంగా చెప్పుకోవాల్సింది కంగనా ప్రధాన పాత్రలో నటించబోతున్న ‘తలైవి’. జయలలిత గారి జీవితం లో ఎంజీఆర్ గారి పాత్ర ముఖ్యంగా చెప్పుకోవాల్సి ఉంటుంది. ఈ సినిమాలో ఆ పాత్రని ‘అరవింద స్వామి‘ చేస్తున్నారు.
ఈరోజు ఎంజీఆర్ గారి వర్థంతి సందర్భంగా ఈ సినిమానుండి ఎంజీఆర్ పాత్రధారి అరవింద స్వామి పోస్టర్స్ కొన్ని విడుదల చేశారు. ఎంజీఆర్ కూడా సినిమాల నుండి రాజకీయాలకి వచ్చారు. ఇదివరకే అరవింద స్వామి ఫస్ట్ లుక్ విడుదల చేసినప్పటికీ అవి హీరోగా ఉన్న లుక్స్ తో విడుదల చేసారు. ఈరోజు విడుదల చేసిన పోస్టర్స్ రాజకీయ నాయకుడిగా మారిన తర్వాత ఆయన లుక్స్ కి సంబందించిన పోస్టర్స్ విడుదల చేసారు. ఈ సినిమా నుండి ఇప్పటివరకు విడుదలైన అన్ని లుక్స్ ఆకట్టుకున్నాయి. ఎ.ఎల్. విజయ్ దర్శకత్వం లో రాబోతున్న ఈ సినిమాని విష్ణు ఇందూరి , శైలేష్ ఆర్ సింగ్ కలిసి నిర్మిస్తున్నారు.