అమరావతి: విజయవాడలో వరద ప్రభావిత ప్రాంతాల్లో సహాయ చర్యలు తీవ్రంగా కొనసాగుతున్నాయని సీఎం చంద్రబాబు నాయుడు వెల్లడించారు.
బుధవారం ఆయన మీడియాతో మాట్లాడారు. “మేము ఎప్పుడూ ప్రజలకు అండగా ఉంటాం. ఎక్కడైనా అవసరం వచ్చినప్పుడు మేము కచ్చితంగా స్పందిస్తాము,” అని భరోసా ఇచ్చారు.
ఇప్పటికే బురద తొలగింపు పనులు ప్రారంభమయ్యాయని, మొత్తం 62 మెడికల్ క్యాంపులు ఏర్పాటు చేశామని తెలిపారు. అదనంగా, పారిశుద్ధ్య పనుల కోసం 2,100 మంది సిబ్బందిని నియమించామని పేర్కొన్నారు. సహాయక చర్యల్లో 100 కంటే ఎక్కువ ఫైరింజన్లు, పొక్లెయిన్లు, టిప్పర్లు పాల్గొన్నట్లు వివరించారు.
ఐఏఎస్‌లు, సీనియర్‌ అధికారులు సహకారం
“సహాయ కార్యక్రమాల్లో 32 మంది ఐఏఎస్‌లు పనిచేస్తున్నారు,” అని చంద్రబాబు వెల్లడించారు. 179 సచివాలయాలకు 179 సీనియర్‌ అధికారులను ఇన్‌ఛార్జులుగా నియమించామన్నారు.
వరదల్లో చనిపోయిన వారి మృతదేహాలను బంధువులకు అప్పగిస్తున్నామని, వారికి రూ.5 లక్షల పరిహారం అందించాలని ఆదేశాలు జారీ చేశామని వివరించారు.
అంతేకాక, మంగళవారం 9,09,191 ఆహార ప్యాకెట్లు పంపిణీ చేసినట్లు తెలిపారు. బుధవారం రోజు 6 లక్షల ఆహార ప్యాకెట్లు పంపిణీ చేసినట్లు వివరించారు.
అంబులెన్స్‌లు, మెడికల్ సహాయ సదుపాయాలు
సీఎం చంద్రబాబు వరద ప్రభావిత ప్రాంతాల్లో అంబులెన్స్‌లను పూర్తిస్థాయిలో అందుబాటులో ఉంచాలని ఆదేశించారు.
ముఖ్యమంత్రి, మంత్రి వర్గం, జిల్లా కలెక్టర్లు, ఉన్నతాధికారులతో టెలీ కాన్ఫరెన్స్ నిర్వహించి సహాయక చర్యలపై సమీక్షించారు. ప్రతి కుటుంబానికి నిత్యావసరాలు అందించాలన్నారు.
బుడమేరే ప్రధాన సమస్య
“విజయవాడకు బుడమేరే ప్రధాన సమస్యగా మారింది” అని సీఎం చంద్రబాబుపేర్కొన్నారు.
“చిన్న వాగులన్నీ బుడమేరులో కలిసిపోవడంతో ఈ పరిస్థితి ఏర్పడింది” అని తెలిపారు.
“వైకాపా నేతలు గత ఐదేళ్లలో ఏమి చేశారని ప్రశ్నిస్తున్నాం. బుడమేరును పట్టించుకోకపోవడంతో ఈ పరిస్థితి ఏర్పడింది” అని వ్యాఖ్యానించారు.
“ముడమేరు ప్రవాహ దారిలో కబ్జాలు తొలగించి, ముంపు ప్రాంతాల్లో విస్తృత చర్యలు చేపడుతున్నాం” అని చంద్రబాబు వెల్లడించారు.
సహాయ చర్యల్లో పురోగతి
“ప్రతి కుటుంబానికి 25 కిలోల బియ్యం, లీటర్‌ పామాయిల్‌, 2 కిలోల ఉల్లిపాయలు, 2 కిలోల బంగాళదుంపలు, కిలో చక్కెర అందించాలి” అని ముఖ్యమంత్రి ఆదేశించారు.
“మూడు లక్షల లీటర్ల పాలు, 8.50 లక్షల తాగునీటి బాటిళ్లు, 5 లక్షల బిస్కెట్ల ప్యాకెట్లు ప్రజలకు అందించాం” అని వివరించారు.
“జ్వరాల నుంచి జాగ్రత్తలపై ప్రజలకు అవగాహన కల్పించడానికి కరపత్రాలు పంపిణీ చేయాలని సూచించారు.
అలాగే, పంటనష్టంపై అంచనాలు నమోదు చేయాలని ఆదేశాలు జారీ చేశారు” అని చంద్రబాబు చెప్పారు.