విశాఖలో దారుణం: జ్యోతిషుడి హత్య, ఆపై శవాన్ని తగులబెట్టిన దంపతులు

విశాఖలో దారుణం: జ్యోతిషుడి హత్య, ఆపై శవాన్ని తగులబెట్టిన దంపతులు

అసభ్య ప్రవర్తన.. ఘోర హత్య

విశాఖపట్నంలో దారుణ హత్యకేసు ఆలస్యంగా వెలుగులోకి వచ్చింది. ఓ జ్యోతిషుడు అసభ్యంగా ప్రవర్తించాడనే కారణంతో దంపతులు అతన్ని హత్య చేసి, ఆనవాళ్లు లేకుండా శవాన్ని తగులబెట్టిన ఘటనకు సంబంధించి పోలీసులు విచారణ జరిపి కీలక విషయాలను వెల్లడించారు.

నిందితులు ఎవరు?

భీమిలి మండలం నేర్లవలస గ్రామానికి చెందిన ఊళ్ల చిన్నారావు, ఆయన భార్య మౌనిక ప్రస్తుతం ఆనందపురం మండలం లొడగలవానిపాలెంలో నివాసముంటున్నారు. జ్యోతిషుడు అప్పన్న (50) గురించి విన్న మౌనిక ఈ నెల 7న పూజల కోసం అతనిని ఇంటికి ఆహ్వానించింది.

అసభ్య ప్రవర్తన..

పూజల సందర్భంగా ఇంట్లో ఎవరూ లేకపోవడంతో, అప్పన్న ఆమెతో అసభ్యంగా ప్రవర్తించినట్టు చెబుతున్నారు. దీనిపై కోపోద్రుక్తురాలైన మౌనిక తన భర్త చిన్నారావుకు ఈ విషయం తెలిపింది. దీంతో, అతను అప్పన్నను హత్య చేయాలని నిర్ణయించుకున్నాడు.

ప్రణాళికబద్ధమైన హత్య

ఫిబ్రవరి 9న సాయంత్రం, చిన్నారావు తన తల్లికి ఆరోగ్యం బాగోలేదని
పూజలు నిర్వహించాలని నమ్మించి, అప్పన్నను తీసుకెళ్లాడు. ద్విచక్రవాహనంపై నేర్లవలస వైపు తీసుకెళ్తూ, మార్గమధ్యంలో బోయపాలెం-కాపులుప్పాడ మధ్య ఉన్న నిర్మానుష్య ప్రాంతంలో అప్పన్నపై దాడి చేసి, చాకుతో పొడిచి హత్య చేశాడు.

శవాన్ని కాల్చిన దంపతులు

దాడి సమయంలో చిన్నారావు తన చేతికి గాయపడగా, ఫిబ్రవరి 10న కేజీహెచ్‌లో చికిత్స పొందాడు. అనంతరం, ఫిబ్రవరి 11న తన భార్యతో కలిసి మళ్లీ హత్యాస్థలానికి వెళ్లాడు. అప్పన్న మృతదేహంపై థిన్నర్, పెట్రోల్ పోసి దహనం చేశాడు.

పోలీసులు కేసును ఎలా చేధించారు?

ఫిబ్రవరి 19న కల్లివానిపాలెం వద్ద అగ్నికి గురైన అస్థిపంజరం స్థానికులు గుర్తించారు. వారి సమాచారం మేరకు పోలీసులు దర్యాప్తు ప్రారంభించారు. చిన్నారావు దంపతులపై అనుమానం వచ్చి వారిని విచారించగా, హత్యకు సంబంధించిన వాస్తవాలు బయటపడ్డాయి.

నిందితుల అరెస్టు

సమగ్ర దర్యాప్తు అనంతరం చిన్నారావు, మౌనికను గురువారం పోలీసులు అరెస్టు చేశారు. అనంతరం వారిని జైలకు తరలించారు.