అమరావతి: బంగాళాఖాతం తుపాన్ల గండం పెరుగుతోంది
బంగాళాఖాతంలో తుపాన్ల ముప్పు పెరుగుతోందని వాతావరణ శాఖ హెచ్చరించింది. అక్టోబరు-డిసెంబరు నెలలు తుపాన్ల కాలంగా గుర్తింపు పొందగా, గత పదేళ్లలో ఈ సమయంలో 11 తుపాన్లు ఏర్పడ్డాయి. వీటిలో 6 తుపాన్లు ఆంధ్రప్రదేశ్‌ తీరాన్ని దాటాయి. ప్రస్తుతం సముద్ర ఉష్ణోగ్రతలు పెరుగుతుండటంతో, తుపాన్ల రూపకల్పనకు అనుకూల పరిస్థితులు నెలకొన్నాయి. నేడు బంగాళాఖాతంలో అల్పపీడనం ఏర్పడే అవకాశం ఉందని నిపుణులు అంచనా వేస్తున్నారు.
కుంభవృష్టి వర్షాలు మళ్లీ కురుస్తాయా?
బంగాళాఖాతంలో ఏర్పడుతున్న అల్పపీడనంతో పాటు చెన్నై తీరం వరకూ సముద్ర ఉపరితల ఉష్ణోగ్రతలు అధికంగా ఉన్నాయి. వీటి ప్రభావం వల్ల ఒక్కసారిగా వర్షపాతం తీవ్రంగా పెరిగే అవకాశముంది. అంతేకాదు, అరేబియా సముద్రంలో కొనసాగుతున్న అల్పపీడనం కూడా వాయుగుండంగా మారి, ద్రోణి స్థితి ఏర్పడే అవకాశం ఉందని ఐఎండీ ప్రకటించింది. గతంలో ఇదే తరహాలో రుతుపవన ద్రోణి కారణంగా విజయవాడ నగరంలో భారీ వర్షాలు కురిసిన విషయం తెలిసిందే.
లోతట్టు ప్రాంతాలకు ముంపు ముప్పు
రాష్ట్రంలో ఇప్పటికే రిజర్వాయర్లు, చెరువులు నిండుకుండల్లా మారిన నేపథ్యంలో, భారీ వర్షాలు కురిస్తే లోతట్టు ప్రాంతాలు ముంపుకు గురయ్యే అవకాశం ఉందని నిపుణులు హెచ్చరిస్తున్నారు. వర్షపాతం తీవ్రంగా ఉంటే ఏపీలో కొన్ని ప్రాంతాల్లో ఒక్కరోజే 20 సెంటీమీటర్ల వర్షం కురిసే అవకాశం ఉంది. ఈ పరిస్థితుల్లో రైతులు, ప్రజలు అప్రమత్తంగా ఉండాలని సూచించారు.
తుపాన్ల చరిత్ర: ఏపీలో ప్రభావం చూపిన కొన్ని తుపాన్లు
- 2014 అక్టోబరు (హుద్ హుద్) – విశాఖపట్నం: విశాఖ, విజయనగరం, శ్రీకాకుళం జిల్లాలు ప్రభావితమయ్యాయి.
- 2016 డిసెంబరు (వార్దా) – చెన్నై సమీపంలో: నెల్లూరు, చిత్తూరు, అనంతపురం, కడప జిల్లాలు.
- 2018 అక్టోబరు (తిత్లీ) – పలాస సమీపంలో: శ్రీకాకుళం, విజయనగరం.
- 2021 సెప్టెంబరు (గులాబ్) – కళింగపట్నం: విశాఖ, శ్రీకాకుళం, విజయనగరం.
- 2023 డిసెంబరు (మిచౌంగ్) – బాపట్ల: గుంటూరు, చిత్తూరు, నెల్లూరు, ప్రకాశం, ఉభయ గోదావరి జిల్లాలు.