ఇంటర్నేషనల్ డెస్క్: అమెరికా అధ్యక్ష ఎన్నికల రేసులో డెమోక్రటిక్‌ పార్టీ అభ్యర్థిగా ఉన్న కమలా హారిస్‌ ప్రచారానికి భారీ విరాళాలు అందుతున్నాయి. ఆమె అభ్యర్థిత్వం ప్రకటించినప్పటినుంచి ఇప్పటివరకు 1 బిలియన్‌ డాలర్లకు పైగా విరాళాలు సేకరించగలిగారని సమాచారం. అమెరికా రాజకీయ వర్గాల్లో దీనిపై విస్తృత చర్చ జరుగుతోంది.
హారిస్‌ ప్రచారానికి పెరుగుతున్న మద్దతు
ఉపాధ్యక్షురాలిగా వ్యవహరిస్తున్న కమలా హారిస్‌ అధ్యక్ష అభ్యర్థిగా ప్రకటించినప్పటినుండీ, దేశవ్యాప్తంగా భారీ స్థాయిలో ప్రజలు ఆమెకు మద్దతు తెలుపుతున్నారు. ఆమె అభ్యర్థిగా ప్రకటించిన మొదటి రోజే 25 మిలియన్‌ డాలర్ల విరాళాలు సేకరించగా, ఒక నెలలోనే 500 మిలియన్‌ డాలర్లు వసూలు చేశారు. ప్రస్తుతం, ఆమె ప్రచారం మరింత ఉద్ధృతమవుతోందని సమాచారం.
ట్రంప్‌ ప్రచారానికి సవాల్‌
రిపబ్లికన్‌ పార్టీ అభ్యర్థి డొనాల్డ్‌ ట్రంప్‌కు కూడా విరాళాలు భారీగా వచ్చాయి. ఆగస్టు నెలలో ట్రంప్‌ తన ప్రచారానికి 130 మిలియన్‌ డాలర్లను సేకరించగా, ఆ నెల చివరిలో 294 మిలియన్‌ డాలర్లకు విరాళాల సంఖ్య చేరింది.
జోబైడెన్‌ వైదొలగడంతో కమలా హారిస్‌కి ఛాన్స్‌
అధ్యక్ష జోబైడెన్‌ తన నామినేషన్‌ నుంచి వైదొలిగిన తర్వాత, డెమోక్రటిక్‌ పార్టీ కమలా హారిస్‌ పేరును అధ్యక్ష అభ్యర్థిగా ప్రతిపాదించింది. ఆ నాటి నుంచి ఆమెకు విరాళాలు పెద్ద ఎత్తున సమకూరుతున్నాయి. పార్టీ శ్రేణులు ఆమెను సంపూర్ణ మద్దతుతో ముందుకు తీసుకువెళ్లడానికి నడుం బిగించారు.
ఎన్నికల ప్రచారం వేడెక్కుతున్న సందర్భం
వచ్చే నెలలో జరగనున్న అమెరికా అధ్యక్ష ఎన్నికల కోసం, రిపబ్లికన్‌, డెమోక్రటిక్‌ పార్టీలు ముమ్మరంగా ప్రచారం నిర్వహిస్తున్నాయి. గెలుపే లక్ష్యంగా ఇరుపార్టీలు విస్తృత ప్రచార కార్యక్రమాలు చేపడుతున్నాయి. ప్రజల్లోని మద్దతు సేకరించడానికి దూకుడుగా వ్యవహరిస్తున్నాయి. గెలుపెవరిది అనే స్పష్టత రాజకీయ విశ్లేషకులకు ఇప్పటికీ రాలేదనే అంటున్నారు.