ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన 100 రోజులు పూర్తయిన తర్వాత సీఎం చంద్రబాబు మళ్ళీ సూపర్ సిక్స్ పథకాల అమలుపై దృష్టి సారించారు. దీపావళి తర్వాత మరిన్ని పథకాలు అమలులోకి తీసుకురావడానికి ప్రణాళికలు రూపొందిస్తున్నారు.
ఈ నేపథ్యంలో టిడిపి ఎమ్మెల్యేలు, ఎంపీలు, ఎమ్మెల్సీలతో చంద్రబాబు కీలక సమావేశం నిర్వహించారు. ఈ సమావేశంలో టీడీపీ సభ్యత్వ నమోదు, పంచాయతీరాజ్ వ్యవస్థలు, పల్లె పండుగ, సూపర్ సిక్స్ పథకాలు వంటి 8 అంశాలపై విస్తృతంగా చర్చించారు.
జగన్ హయాంలో రాష్ట్రంలో ఏ వ్యవస్థ సజావుగా పని చేయలేకపోయిందని, ప్రతి అరాచకం వెనుక అసాంఘిక శక్తులు ఉన్నాయని చంద్రబాబు ఆరోపించారు.
సూపర్ సిక్స్ పథకాలు రాష్ట్ర ప్రజలకు మేలు చేసేలా ఉండాలని, అలాగే మునుపటి ప్రభుత్వంలో చేసిన తప్పులు పునరావృతం కాకుండా జాగ్రత్తలు తీసుకోవాలని చంద్రబాబు నేతలకు సూచించారు.
లిక్కర్, ఇసుక వ్యాపారాల్లో టిడిపి నేతలు జోక్యం చేసుకోవద్దని, పార్లమెంట్ ఎంపీ మాగుంట కుటుంబం వారసత్వంగా కొనసాగించే వ్యాపారం వేరని స్పష్టంచేశారు. రాబోయే ఎన్నికల్లో తమ పార్టీ ప్రవర్తనపై ప్రజల నమ్మకం పెంచడమే లక్ష్యమని, పార్టీ సభ్యులు క్రమశిక్షణతో ఉండాలని దిశానిర్దేశం చేశారు.