అమరావతి: డ్రగ్ వ్యసన నిర్మూలన కోసం సీఎం చంద్రబాబు కీలక నిర్ణయాలు
బాపట్ల మున్సిపల్ హైస్కూల్‌లో ఇవాళ (శనివారం) జరిగిన తల్లిదండ్రుల-ఉపాధ్యాయుల సమావేశం అందరి దృష్టిని ఆకర్షించింది. ముఖ్యమంత్రి నారా చంద్రబాబు నాయుడు, మంత్రి నారా లోకేష్ ప్రత్యేకంగా ఈ కార్యక్రమానికి హాజరయ్యారు. విద్యార్థులతో స్నేహపూర్వకంగా మట్లాడిన ఈ సమావేశం అనేక సరికొత్త విషయాలకు తెరతీసింది.
సీఎం చంద్రబాబు “ఈగల్ వ్యవస్థ“ను తీసుకువచ్చి, గంజాయి వినియోగాన్ని పూర్తిగా నివారించాలని ప్రతిపాదించారు. సైబర్ నేరాలు, డ్రగ్ బారిన పడ్డ యువత సమస్యలపై ఆయన తన ఆందోళన వ్యక్తం చేశారు. “మా లక్ష్యం రాష్ట్రాన్ని డ్రగ్ ఫ్రీ ఆంధ్రప్రదేశ్‌గా తీర్చిదిద్దడం,” అని ఆయన స్పష్టం చేశారు.
సైబర్ నేరగాళ్లు యువతను మాయమాటలతో బలవంతం చేస్తున్నారని, టెక్నాలజీని జాగ్రత్తగా ఉపయోగించుకోవాలని సూచించారు. “24 గంటల ఫోన్ మీదే ఆధారపడడం అనేది బలహీనతగా మారుతోంది,” అని సీఎం పేర్కొన్నారు. యువత భవిష్యత్తును చీకటి బాట పట్టిస్తున్న డ్రగ్స్ విషయంలో తల్లిదండ్రులు, ఉపాధ్యాయులు ఎంతో జాగ్రత్తగా ఉండాలని కోరారు.
తల్లిదండ్రులు, ఉపాధ్యాయులు డ్రగ్స్ ముప్పు, సైబర్ నేరాలు వంటి సమస్యలపై మరింత జాగ్రత్తగా వ్యవహరించాలని చంద్రబాబు పిలుపునిచ్చారు. “ఒకసారి డ్రగ్స్ వ్యసనంలో పడితే, తిరిగి సాధారణ జీవితానికి రావడం చాలా కష్టం. ఇది సర్వనాశనం చేస్తుంది,” అని ఆయన హెచ్చరించారు.
విద్యార్థులు కూడా ఈ సమావేశంలో తమ ఆందోళనలను వ్యక్తం చేశారు. “డ్రగ్స్ వద్దు బ్రో” అంటూ ఒక విద్యార్థి చేసిన ప్రసంగం అందరినీ కదిలించింది. విద్యార్థులతో మాట్లాడిన చంద్రబాబు, డ్రగ్స్ విపత్తును ఎదుర్కొనే విషయాల్లో వారికి ప్రోత్సాహం ఇచ్చారు.
గంజాయి సమస్యను పరిష్కరించేందుకు ఈగల్ వ్యవస్థ ప్రాధాన్యమని సీఎం చంద్రబాబు పేర్కొన్నారు. గంజాయి కూరగాయల్లా ఇంటి వద్దే పండించే స్థాయికి రావడం దురదృష్టకరమని ఆయన అన్నారు. ఈ సమస్యను ప్రభుత్వ అధికారులతో కలిసి సమూలంగా పారద్రోలాలని నిర్ణయించారు.