వాషింగ్టన్: భారత పార్మా దిగ్గజం బయోటెక్‌కు అమెరికాలో ఎదురుదెబ్బ తగిలింది. బయోటెక్ సంస్థ తయారు చేసిన కరోనాను ఎదుర్కొనే వ్యాక్సిన్ అయిన కోవాగ్జిన్ అత్యవసర వినియోగాన్ని అమెరికా ఫుడ్ అండ్ డ్రగ్ అడ్మినిస్ట్రేషన్ (ఎఫ్డీఏ) తిరస్కరించింది. ఈ టీకాను అమెరికాలో వినియోగించడానికి సంబంధించిన భారత్ బయోటెక్, యూఎస్ భాగస్వామ్య కంపెనీ అయిన ఆక్యుజెన్‌తో ప్రతిపాదనలను బైడెన్‌ సర్కార్‌ నిరాకరించింది.
ఇంకోవైపు ఇండియా వ్యాక్సినేషన్‌ కార్యక్రమంలో కోవాగ్జిన్‌ను చేర్చిన దాదాపు ఆరు నెలల గడచినప్పటికీ భారత్ బయోటెక్ మూడో దశ క్లినికల్ ట్రయల్స్ డేటాను వెల్లడించలేదన్న విమర్శలు వస్తున్న సమయంలో అమెరికాలో ఈ వ్యాక్సిన్ కు ఎదురుదెబ్బ తగలడం గమనార్హం. ఇదిలా ఉండగా తాము అత్యవసర అనుమతి కోరబోమని, కోవిడ్ టీకా ఆమోదం కోసం మాత్రమే దాఖలు చేస్తామని కంపెనీ గురువారం ప్రకటించింది.
వ్యాక్సిన్ విషయంలో ఇంకా అదనపు క్లినికల్ ట్రయల్ ప్రారంభించాలన్న ఎఫ్డీఏ సిఫారసు ఆధారంగా ఈ నిర్ణయం తీసుకున్నట్లు, అత్యవసర వినియోగానికి అవసరమైన బయోలాజిక్స్ లైసెన్స్ అప్లికేషన్ (బీఎల్ఎ) కోసం కూడా దరఖాస్తు చేస్తామని తెలిపింది. కోవాగ్జిన్‌కు సంబంధించిన మాస్టర్ ఫైల్‌ను అందజేయాలని ఎఫ్డీఏ సూచించినట్లు కూడా ఆక్యుజెన్ సీఈవో శంకర్ ముసునూరి తెలిపారు.
కోవాగ్జిన్‌ను యూఎస్‌కు అందించే విషయంలో తాము కట్టుబడి ఉన్నామని అన్నారు. అలాగే కోవాక్సిన్ కోసం మార్కెటింగ్ అప్లికేషన్ కోసం ఇంకా చాలా క్లినికల్ ట్రయల్స్ డేటా అవసరమని కంపెనీ భావిస్తోంది. అయితే యూఎస్ లో ప్రస్తుతం ఫైజర్, మోడెర్నా రెండు టీకాలను వినియోగిస్తున్న సంగతి తెలిసిందే. ఈ నేపథ్యంలో కోవాగ్జిన్‌కు అత్యవసర వినియోగ అనుమతి ఇవ్వాలంటూ భారత్ బయోటెక్ తరపున అక్కడి ప్రముఖ ఫార్మా కంపెన ఆక్యుజెన్ రెగ్యులేటరీకి దరఖాస్తు చేసుకుంది.
భారత్ లో మూడో దశ క్లినికల్ ప్రయోగాల డేటాను జూలైలో బయోటెఖ్ అందించనుంది. డబ్ల్యూహెచ్వో సైతం కోవాగ్జిన్ వ్యాక్సిన్‌ను తాము గుర్తించడం లేదని ప్రకటించిన కొద్దిరోజుల్లోనే ఈ పరిణామం సంభవించింది. మూడో దశ పరీక్షల డేటాను పరిశీలించిన మీదటే డబ్ల్యూహెచ్వో గుర్తింపు వచ్చే అవకాశం ఉంది. డబ్ల్యూహెచ్వో నుండి ఎటువంటి గుర్తింపు లేని ఏ వ్యాక్సిన్ అయినా రెండు మోతాదులు వేయించుకున్నా వారిని కొన్ని దేశాలలో వ్యాక్సిన్ వేసుకోని వారిగానే పరిగణిస్తారు.