చెన్నై సూపర్ కింగ్స్‌ సొంతగడ్డ చెపాక్ స్టేడియంలో రాయల్ ఛాలెంజర్స్ బెంగళూరు చరిత్ర సృష్టించింది. 17 ఏళ్ల తర్వాత చెన్నైను చెపాక్‌లో ఓడించిన ఆర్సీబీ, 50 పరుగుల తేడాతో ఘన విజయం అందుకుంది. 197 పరుగుల లక్ష్యంతో బరిలోకి దిగిన చెన్నై 20 ఓవర్లలో 8 వికెట్లు కోల్పోయి 146 పరుగులకే పరిమితమైంది.
చెన్నై ఇన్నింగ్స్‌లో రచిన్‌ రవీంద్ర (41; 31 బంతుల్లో 5 ఫోర్లు) మెరుగైన ఆరంభం ఇచ్చినప్పటికీ మిడిల్ ఆర్డర్ ధాటిని తట్టుకోలేకపోయింది. కెప్టెన్ రుతురాజ్ గైక్వాడ్‌ (0), దీపక్‌ హుడా (4), సామ్ కరన్ (8) విఫలమవ్వగా, శివమ్ దూబే (19), అశ్విన్ (0) నిస్సహాయంగా క్రీజ్ వీడారు.
చివర్లో ధోనీ (30*) జడేజా (25) ప్రయోగాలు చేసినా ఫలితం కనిపించలేదు. ఆర్సీబీ బౌలర్లలో హేజిల్‌వుడ్‌ 3, యశ్ దయాల్‌ 2, లివింగ్‌స్టోన్‌ 2, భువనేశ్వర్‌ కుమార్‌ ఒక వికెట్ తీశారు.
అంతకుముందు టాస్ ఓడి బ్యాటింగ్‌కు దిగిన బెంగళూరు 20 ఓవర్లలో 7 వికెట్లు కోల్పోయి 196 పరుగులు చేసింది. రజత్‌ పటీదార్‌ (51), ఫిల్‌ సాల్ట్‌ (32), విరాట్‌ కోహ్లీ (31), పడిక్కల్ (27) మంచి ఇన్నింగ్స్‌తో ఆకట్టుకున్నారు. చివర్లో టిమ్ డేవిడ్‌ (22; 8 బంతుల్లో 3 సిక్సర్లు) హ్యాట్రిక్ సిక్స్‌లతో స్కోరును బలంగా నిలబెట్టాడు.
చెన్నై బౌలర్లలో నూర్ అహ్మద్‌ 3, పతిరన 2, ఖలీల్ అహ్మద్‌, అశ్విన్ తలో వికెట్ తీశారు. ఈ గెలుపుతో ఆర్సీబీ ఈ సీజన్‌లో రెండో విజయాన్ని నమోదు చేసింది. చెన్నైపై ఈ విజయం బెంగళూరు జట్టు కాన్ఫిడెన్స్‌ను రెట్టింపు చేసింది.