ఆంధ్రప్రదేశ్: ఏపీలో ప్రతి జిల్లాలో సైబర్‌ క్రైమ్‌ స్టేషన్‌ ఏర్పాటు: డీజీపీ ద్వారకా తిరుమలరావు
ఆంధ్రప్రదేశ్‌లో సైబర్‌ క్రైమ్‌ కేసులు విపరీతంగా పెరుగుతున్నాయని, వీటి నియంత్రణ కోసం ప్రతి జిల్లాలో సైబర్‌ క్రైమ్‌ పోలీసు స్టేషన్‌ను ఏర్పాటు చేయాలని ప్రణాళిక రూపొందిస్తున్నట్లు డీజీపీ ద్వారకా తిరుమలరావు వెల్లడించారు. శ్రీకాకుళంలో ఆయన మీడియాతో మాట్లాడారు.
సైబర్‌ క్రైమ్‌పై అవగాహనే కీలకం
‘‘సైబర్‌ క్రైమ్‌ ప్రస్తుతం దేశవ్యాప్తంగా వేగంగా విస్తరిస్తున్న సమస్య. వీటిని నిరోధించేందుకు ప్రజల్లో అవగాహన కల్పించడమే ప్రధాన మార్గం. ఎవరికైనా అనుమానాస్పద ఫోన్‌ కాల్స్ వస్తే డబ్బులు చెల్లించవద్దని ప్రజలను అప్రమత్తం చేస్తున్నాం. సైబర్‌ నేరాలను అరికట్టేందుకు నిపుణుల సహాయాన్ని తీసుకుంటున్నాం’’ అని డీజీపీ తెలిపారు.
గంజాయి నిర్మూలనపై ప్రత్యేక దృష్టి
గంజాయి నిర్మూలనకు రాష్ట్ర ప్రభుత్వం ఐదుగురు క్యాబినెట్ మంత్రులతో కూడిన కమిటీని ఏర్పాటు చేసిందని, ఈగిల్ సంస్థ సహకారంతో గంజాయి అక్రమ రవాణాకు అడ్డుకట్ట వేస్తున్నట్లు వివరించారు. అనకాపల్లి జిల్లా పరవాడలో 37వేల కిలోల గంజాయిని దగ్ధం చేయనున్నట్లు తెలిపారు. ‘‘గంజాయి పట్టుబడిన ప్రతి సందర్భంలో మూలాలు ఉత్తరాంధ్రలోనే ఉంటున్నాయి. మాదకద్రవ్యాల నిర్మూలనలో భాగంగా పాఠశాలలు, కళాశాలల విద్యార్థులకు అవగాహన కార్యక్రమాలు నిర్వహిస్తున్నాం’’ అని డీజీపీ పేర్కొన్నారు.
లక్ష సీసీ కెమెరాల లక్ష్యం
మార్చి 1 నాటికి రాష్ట్రవ్యాప్తంగా లక్ష సీసీ కెమెరాలు ఏర్పాటు చేయడమే లక్ష్యంగా ఉన్నామని డీజీపీ తెలిపారు. ‘‘నేరాలను నిరోధించడానికి టెక్నాలజీని ఉపయోగించుకుంటూ దాతల, ప్రజల సహకారంతో సీసీ కెమెరాలను ఏర్పాటు చేస్తున్నాం. రాష్ట్రంలో 2 లక్షల స్పాట్లను గుర్తించాం. ఆ ప్రదేశాల్లో రెండు లక్షల సీసీ కెమెరాలు అవసరమవుతాయి’’ అని వివరించారు.
మావోయిస్టుల ఏరివేతపై కఠిన చర్యలు
దేశవ్యాప్తంగా మావోయిస్టుల ఏరివేత కొనసాగుతున్నదని, ప్రస్తుతం ఆంధ్రప్రదేశ్ వైపు వారి చొరబాటు అవకాశం లేదని స్పష్టం చేశారు. ‘‘మావోయిస్టులను అరికట్టడంలో రాష్ట్ర పోలీసు శాఖ సమర్థవంతంగా పనిచేస్తోంది’’ అని డీజీపీ వివరించారు.